برمنگھم۔27 جون (سیاست ڈاٹ کام) بابر اعظم ونڈے کرکٹ میں تیز ترین 3 ہزار رنز مکمل کرنے والے دنیا کے دوسرے جبکہ ایشیا کے پہلے بیٹسمین بن گئے۔انہوں نے نیوزی لینڈ کیخلاف ورلڈکپ میچ میں کیریئر کی 68 ویں اننگز میں 3 ہزار رنز مکمل کرتے ہوئے ویسٹ انڈیز کے ویون رچرڈز کا ریکارڈ توڑ دیا۔ ویوین رچرڈز نے 69 اننگز میں 3 ہزار رنز کے ہندسے کو عبور کیا تھا لیکن بابر نے ایک اننگز قبل ہی یہ اعزاز حاصل کرکے انہیں اس ریکارڈ سے محروم کردیا۔ ونڈے کرکٹ میں تیز ترین 3 ہزار رنز مکمل کرنے کا ورلڈ ریکارڈ جنوبی افریقی اوپنر ہاشم آملہ کو حاصل ہے جنہوں نے 57 اننگز میں یہ سنگ میل عبور کیا ۔ بابر اعظم تیز ترین 3 ہزار رنز بنانے والے دنیا کے پہلے بیٹسمین تو نہ بن سکے لیکن سب سے کم اننگز میں یہ سنگ میل عبور کرنے والے ایشیائی کھلاڑی بن گئے ہیں۔ بابر سے قبل تیز ترین 3 ہزار رنز اسکور کرنے والے ایشیائی بیٹسمین ہندوستانی اوپنر شکھر دھون تھے جنہوں نے 72 اننگز میں یہ سنگ میل عبور کیا تھا لیکن بابر نے ان سے یہ ریکارڈ چھین لیا۔اسکے علاوہ بابر 3 ہزار ونڈے انٹرنیشنل رنز مکمل کرنے والے 20 ویں پاکستانی بھی بن گئے ہیں۔ اسکے علاوہ بابر اعظم کم سے کم اننگز میں 10 سنچری مکمل کرنے والے پہلے ایشیائی بیٹسمین بھی بن گئے ہیں۔
انہوں نے دھون اور کپتان ویراٹ کوہلی کو پیچھے چھوڑتے ہوئے ریکارڈ اپنے نام کیا۔ بابر اعظم نے اپنی 10ویں سنچری 68 ویں اننگز میں مکمل کی جبکہ دھون نے یہ کارنامہ 77 جبکہ کپتان کوہلی نے 80 ویں اننگز میں انجام دیا تھا۔
