22ڈسمبر کو نئی پارٹی تشکیل دینے اورانتخابات میں حصہ لینے کا اعلان
کولکاتہ4؍ڈسمبر ( ایجنسیز )مغربی بنگال کی حکمراں ترنمول کانگریس نے جمعرات کو بھرت پور کے ایم ایل اے ہمایوں کبیر کو پارٹی سے معطل کر دیا ہے۔ انہوں نے مرشد آباد ضلع میں بابری مسجد کی تعمیر کا اعلان کر کے تنازعہ کو جنم دیا تھا۔ ہمایوں کبیر گزشتہ کچھ سالوں سے پارٹی کے اندرونی معاملات سمیت مختلف مسائل پر متنازعہ بیانات دینے کی وجہ سے سرخیوں میں ہیں۔واضح رہے کہ انہوں نے کہا تھا کہ 6 دسمبر کو بیلڈنگا میں مسجد کا سنگ بنیاد رکھا جائے گا۔معطلی کا اعلان کرتے ہوئے ترنمول کے سینئر لیڈر فرہاد حکیم نے کہا کہ کبیر کا رویہ ایسے وقت میں انتہائی غیر منظم تھا جب پارٹی ریاست میں امن اور فرقہ وارانہ ہم آہنگی کو برقرار رکھنے کے لیے کام کر رہی ہے۔فرہاد حکیم ممتا بنرجی حکومت کے ایک سینئر وزیر ہیں۔انہوں نے کہا ہمایوں کبیر فرقہ وارانہ سیاست میں ملوث ہیں اور ٹی ایم سی اس کے سخت خلاف ہے۔ ٹی ایم سی فرقہ وارانہ سیاست میں یقین نہیں رکھتی ہے۔ ان کا اب پارٹی سے کوئی تعلق نہیں ہے۔ انہیں ہماری اعلیٰ قیادت کی ہدایت پر معطل کیا جا رہا ہے۔ جب ان سے تبصرہ کرنے کیلئے پوچھا گیا تو کبیر نے کہا کہ وہ استعفیٰ دیں گے اور ایک نئی سیاسی تنظیم بنائیں گے اور انتخابات میں بھی حصہ لیں گے۔ ہمایو کبیر نے دعویٰ کیا تھا کہ 6 دسمبر کے پروگرام میں لاکھوں لوگ شرکت کریں گے جس سے نیشنل ہائی وے 12 کو بلاک کیا جا سکتا ہے۔
جو جنوبی کولکاتہ کو شمالی سلی گڑی سے جوڑتا ہے۔