کینبرا۔6 نومبر (سیاست ڈاٹ کام ) بابر اعظم کی شاندار فارم اور بہترین کارکردگی کا سلسلہ جاری ہے اور آسٹریلیا کے خلاف دوسرے ٹی20 میچ میں انہوں نے نصف سنچری اسکور کر کے ایک نیا منفرد اعزاز حاصل کرلیا جبکہ ایک اور شاندار اننگز کی بدولت وہ نیا عالمی ریکارڈ قائم کرسکتے ہیں۔آسٹریلیا کے خلاف سیریز کے ذریعے کیریئر میں پہلی مرتبہ قیادت کرنے والے بابر اعظم پر بظاہرکپتانی کا کوئی بوجھ محسوس نہیں ہورہا ہے اور آسٹریلیا کے خلاف ابتدائی دونوں ٹی20 میچوں میں نصف سنچری اسکور کر کے انہوں نے اس کا بھرپور ثبوت پیش کیا۔پہلے میچ میں نصف سنچری کے بعد بابر نے دوسرے ٹی20 میں بھی نصف سنچری اسکور کی اور ساتھ ہی ایک منفرد اعزاز حاصل کر لیا۔ بابر اعظم نے آسٹریلیا کے خلاف دوسرے میچ میں 38گیندوں پر 6 چوکوں کی مدد سے 50 رنز کی اننگز کھیلی اورکیلنڈر ایر میں مجموعی طور پر 1600 سے زائد رنز بنانے کا اعزاز حاصل کرلیا۔ بابر اعظم یہ اعزاز حاصل کرنے والے پاکستان کے پہلے بیٹسمین ہیں اور اب تک رواں سال ڈومیسٹک اور انٹرنیشنل 38 میچوں میں 3 سنچریوں اور 12 نصف سنچریوں کی مدد سے 1601 رنز بنائے ہیں۔کیلنڈر ایئر میں سب سے زیادہ رنز بنانے کا اعزاز عالمی شہرت کرس گیل کے پاس ہے جنہوں نے 2015 میں 36 اننگز میں 1665 رنز اسکور کیے ہیں دوسرے نمبر پر کپتان ویرات کوہلی نے جنہوں نے 2016 میں 31 اننگز کے دوران 1614 رنز اسکور کئے ۔ بابر اعظم مزید 65 رنز بنا کر کرس گیل کا عالمی ریکارڈ اپنے نام کر سکتے ہیں۔
