لاہور: پاکستان کرکٹ ٹیم کا نیوزی لینڈ کے خلاف 5 ٹی ٹوئنٹی اور 3 ونڈے میچز کیلئے نیوزی لینڈ کا دورہ مقرر ہے۔ اس دورے کے تعلق سے ذرائع کا کہنا ہے کہ نیوزی لینڈ کے خلاف ٹی 20 اسکواڈ میں بابراعظم کی شمولیت کا امکان نہیں ہے۔ ذرائع کا یہ بھی بتانا ہے کہ بابر کی ونڈے ٹیم میں شمولیت کا تاحال فیصلہ نہیں ہوا ہے۔ دورۂ نیوزی لینڈ کیلئے ٹی ٹوئنٹی اسکواڈ میں نوجوان کھلاڑیوں کو شامل کرنے کا فیصلہ کیا گیا ہے۔ دوسری جانب چمپئنز ٹرافی میں ناکامی کے بعد بابر اعظم پیڈل ٹینس کھیلنے لگے ہیں جس کی تصاویر سامنے آئی ہیں۔ بابر آج کل اپنے بھائیوں ، ساتھی کرکٹرز اور دوستوں کے ساتھ پیڈل ٹینس کھیل رہے ہیں۔ پاکستانی ٹیم چمپئنز ٹرافی سے باہر ہو چکی
ہے۔ پاکستانی کرکٹرز گزشتہ ہفتے گھروں کو روانہ ہوگئے تھے۔ اب سابق کپتان بابر پیڈل ٹینس سے لطف اندوز ہو رہے ہیں اور بابر کا ساتھ کرکٹر امام الحق، عثمان قادر اور ان کے برادران دے رہے ہیں۔ آئی سی سی ایونٹ میں میزبان پاکستان سے بڑی توقعات تھیں لیکن ٹیم پہلے مرحلہ سے آگے نہ بڑھ پائی۔ اب پاکستانی ٹیم 12 مارچ کو نیوزی لینڈ روانہ ہوگی جہاں پہلے مرحلے میں5 ٹی ٹوئنٹی میچزکی سیریز 16 مارچ سے کھیلی جائے گی۔ دونوں ملکوں کی ٹی ٹوئنٹی سیریز کے بعد 3 ونڈے میچز پر مشتمل سیریز کا آغاز 29 مارچ کو ہوگا۔
