برمنگھم ۔27 جون (سیاست ڈاٹ کام ) پاکستانی کے نوجوان بیٹسمین بابر اعظم نے شاندار سنچری کی بدولت ناصرف پاکستان کو نیوزی لینڈ کے خلاف کامیابی سے ہمکنارکیا بلکہ اس کے ساتھ ہی وہ عظیم بیٹسمینوں کی فہرست میں بھی شامل ہو گئے ہیں۔ نیوزی لینڈ کے خلاف مشکل وکٹ پر بابر نے شاندار بیٹنگ کرتے ہوئے ناقابل شکست 101رنز کی اننگز کھیلی جس کی بدولت پاکستان نے نیوزی لینڈ کو 6وکٹوں سے شکست دے کر سیمی فائنل میں رسائی کی امیدیں روشن کر لی ہیں۔اس سنچری کے ساتھ ہی بابر اعظم کے ورلڈ کپ میں رنز کی تعداد 333 ہوگئی ہے اور وہ عظیم بیٹسمینوں کی منفرد فہرست کا حصہ بن گئے ہیں۔ بابر اعظم 2019 کے ورلڈکپ میں 25 سال سے کم عمر میں سب سے زیادہ رنز بنانے والے بیٹسمین ہیں جہاں ان سے قبل عظیم کھلاڑی یہ اعزاز اپنے نام رکھ چکے ہیں۔ 1992 کے ورلڈ کپ میں یہ اعزاز 25 سال سے کم عمر برائن لارا کے پاس تھا جنہوں نے 333 رنز اسکور کئے تھے۔ 1996 میں لٹل ماسٹر اور بیٹسمین سچن تنڈولکر نے 523 رنز بنا کر یہ اعزاز حاصل کیا تھا جبکہ 1999 میں آسٹریلیا کے رکی پونٹنگ نے 354 رنز بنائے تھے۔ 2003، 2011 اور 2015 کے ایونٹس میں کسی بھی نوجوان بیٹسمین کی کارکردگی کچھ خاص نہیں تھی لیکن 2007 کے ورلڈ کپ میں جنوبی افریقہ کے 25 سال سے کم عمر اے بی ڈی ویلیئرز نے 372 رنز بنائے تھے اور سب سے کامیاب نوجوان بیٹسمین رہے تھے اور اس سال یہ اعزاز پاکستان کے بابر اعظم نے حاصل کر لیا۔
