کراچی ۔ پاکستانی کرکٹ ٹیم کے کپتان بابر اعظم ٹی ٹوئنٹی کرکٹ میں تیز ترین سات ہزار رنز بنانے والے ویسٹ انڈیز کے کھلاڑی کرس گیل کا عالمی ریکارڈ توڑنے کے قریب پہنچ گئے۔ بابراعظم کوکرس گیل کا تیز ترین سات ہزار رنز بنانے کا ریکارڈ توڑنے کے لئے سات اننگز میں 121 رنز کی ضرورت ہے۔ بابر اعظم اب تک 184 اننگز میں6 ہزار 879 رنز بنا چکے ہیں۔دوسری جانب کرس گیل نے ٹوئنٹی20 کرکٹ میں سات ہزار رنز192 اننگز میں مکمل کیے تھے۔ بین الاقوامیکرکٹ میں پاکستانی کرکٹ ٹیم کے کپتان بابر اعظم تیز رفتاری سے تین ہزار، چار ہزار اور چھ ہزار رنز بنانے والے بیٹسمین ہیں۔ایشیائی بیٹسمینوں میں انکا شمار تیز رفتاری سے ایک ہزار اور دو ہزار رنز بنانے والے کرکٹرز میں ہوتا ہے۔کرس گیل نے ٹوئنٹی 20 کرکٹ میں 11 اپریل 2015 کو تیز ترین7 ہزار رنز بنانے کا ریکارڈ قائم کیا تھا جسے اب تک کوئی نہیں توڑ سکا ہے۔امید کی جارہی ہے کہ امارات میں عنقریب منعقد شدنی ٹی 20 ورلڈ کے دوران بابر اعظم جارحانہ اوپنر گیل کا ریکارڈ توڑ سکتے ہیں ۔بابر پر ہندوستان کے خلاف ہونے والے مقابلے پر بھی شائقین کی نظریں ہوں گی۔
