ظہیر آباد ۔ 13 ۔ جولائی : ( سیاست نیوز ) : عیدگاہ کمیٹی ظہیر آباد کی اپیل پر مسلمانان ظہیر آباد نے آج یہاں عیدگاہ میں ، باران رحمت کے نزول کے لیے الحاج سید شاہ عزیز الدین قادری کی اقتداء میں صبح 9 بجے نماز استسقاء ادا کی جب کہ مفتی نذیر احمد نے خطبہ دیا اور رحمت باراں کے نزول کے لیے بارگاہ رب العزت میں رقت انگیز دعائیں کیں ۔ نماز سے قبل مفتی عبدالصبور قاسمی نے خطاب کرتے ہوئے احادیث کی روشنی میں امساک باراں کے لیے بندوں کی بداعمالیوں کو ذمہ دار ٹھہرایا اور کہا کہ امساک باراں کو باران رحمت میں تبدیل کرنے کے لیے بارگاہ خداوندی میں تین دنوں تک نماز استسقاء کی ادائیگی ضروری ہے ۔ صدر عیدگاہ کمیٹی محمد عبدالسلیم نے 14 اور 15 جولائی کو بھی نماز استسقاء کی ادائیگی کے لیے 9 بجے صبح سے قبل عیدگاہ پہنچ جانے کی مسلمانان ظہیر آباد سے مخلصانہ اپیل کی ۔۔