نئی دہلی۔ ہندوستان اور آسٹریلیا کے درمیان ٹسٹ سیریز اگلے موسم گرما میں مزید بڑھ جائے گی کیونکہ بورڈ آف کنٹرول فار کرکٹ ان انڈیا (بی سی سی آئی) اور کرکٹ آسٹریلیا (سی اے) نے اعلان کیا کہ بارڈر۔گواسکر ٹرافی کو پانچ ٹسٹ مقابلوں کی سیریز کے طور پر کھیلا جائے گا۔ 1991-92 کے بعد پہلی بار آسٹریلیا اور ہندوستان اس موسم گرما میں پانچ ٹسٹ میچوں کی سیریز میں مدمقابل ہوں گے۔ بارڈر۔گواسکر ٹرافی کے لیے توسیعی سیریز 2024-25 کے موسم گرما سے شروع ہوگی اور مستقبل میں ایسے ہی کھیلی جائے گی۔ بی سی سی آئی کے سکریٹری جے شاہ نے کہا بی سی سی آئی ٹسٹ کرکٹ کے بھرپور ورثے کو بچانے کے لیے اپنی لگن میں ثابت قدم ہے، ایک ایسا فارمیٹ جس کا ہم سب سے زیادہ احترام کرتے ہیں۔ بارڈرگواسکر ٹرافی کو پانچ ٹسٹ تک بڑھانے کے لیے کرکٹ آسٹریلیا کے ساتھ ہمارا جاری تعاون ٹسٹ کرکٹ کی اہمیت کو فروغ دینے اور اسے بلند کرنے کے لیے ہمارے اجتماعی عزم کی نشاندہی کرتا ہے۔ یہ توسیع ٹسٹ کرکٹ کے جوہرکو بڑھانے اور اس کی وراثت کو برقرار رکھنے کے لیے ہمارے مشترکہ وژن کی
بازگشت کرتی ہے۔ ہندوستان اور آسٹریلیا کے ساتھ مل کر، ہم ایک دلکش تماشے کی توقع کرتے ہیں جو دنیا بھر کے شائقین کو اپنی شدت اور جوش و خروش سے تفریح کا سامان فراہم کر ے گا۔ مائیک بیئرڈ نے مزید کہا ہم پوری طرح خوش ہیں کہ ہمارے دو عظیم کرکٹ ممالک کے درمیان شدید مسابقت اور اس سے پیدا ہونے والے جوش و خروش کے پیش نظر بارڈر۔گواسکر ٹرافی کو پانچ ٹسٹ تک بڑھا دیا گیا ہے۔ کرکٹ کی دنیا کی نظریں آسٹریلیا پر ہوں گی اور مجھے
یقین ہے کہ پیٹ کمنزکی ورلڈ چمپئن ٹیم ہندوستانی ٹیم کی مہارت اور گہرائی پر قابو پا سکتی ہے جس نے یہاں پچھلی دو سیریز جیتنے اور ٹرافی پر دوبارہ قبضہ کرنے کے لیے بہت شاندارکھیلا۔ ہم بی سی سی آئی کے ساتھ تعاون کے شکرگزار ہیں اور میں ٹسٹ کرکٹ کی اہمیت کے بارے میں مسٹر شاہ کے جذبات کی قدر اورعکاسی کرتا ہوں۔ کرکٹ کا موسم گرما ایک شاندار ماحول فراہم کرے گا۔ دونوں ٹیموں کے درمیان پچھلی چار ٹسٹ مقابلوں کی سیریز میں، ہندوستان زیادہ غالب ٹیم رہی ہے، جو ہر بار جیتتی ہے۔ اس میں 2018-19 اور 2020-21 (دونوں 2-1 کے یکساں فرق سے) کے درمیان یکے بعد دیگرے سال میں آسٹریلیا میں ٹیسٹ سیریز جیتنا شامل ہے۔ 2018-19 میں، ہندوستان آسٹریلیا میں ٹسٹ سیریز جیتنے والی پہلی ایشیائی ٹیم بنی تھی۔ اس مرتبہ اور مستقبل کی سیریز کے لیے بارڈر۔گواسکر ٹرافی کی توسیع ان ممالک کے موقف کو تسلیم کرتی ہے جنہوں نے 2023 کے آئی سی سی ورلڈ ٹسٹ چمپئن شپ کے فائنل میں حصہ لیا تھا اور ساتھ ہی کھیل کے نمایاں بین الاقوامی فارمیٹ کے لیے ان کی مستقل وابستگی کو ظاہر کیا تھا۔
