ممبئی، 7 نومبر (یو این آئی) بالی ووڈ کی سرکردہ اداکارہ اور گلوکارہ سلکھشنا پنڈت کا جمعرات کے روز دل کا دورہ پڑنے سے دیہانت ہو گیا ۔ وہ 71 برس کی تھیں ۔ کل شام 7 بجے کے قریب دل کا دورہ پڑنے پر انہیں ناناوتی ہسپتال لے جایا گیا جہاں انہوں نے آخری سانس لی۔ انہوں نے سانس لینے میں دشواری کی شکایت کی تھی اور وہ کافی عرصہ سے بیمار بھی تھیں ان کے بھائی اور موسیقار للت پنڈت اور سابق اداکارہ اور بہن وجیتا پنڈت نے ان کی موت کی تصدیق کی ۔ ان کی موت کی خبر کے بعد بالی ووڈ انڈسٹری میں سوگ کی لہر دوڑ گئی۔ انہوں نے 1975 میں سنجیو کمار کے ساتھ ’’الجھن‘‘ سے فلم انڈسٹری میں قدم رکھا اور پھر اپنے دور کے تقریبا تمام ٹاپ اسٹارز کے ساتھ کام کیا ۔ ان کی دیگر بڑی فلمیں سنکوچ، ہیرا پھیری، خاندان ، دھرم کانٹا اور ارپن شامل ہیں ۔ ایک پلے بیک گلوکارہ کے طور پر ان کا متوازی اور متاثر کن کریئر بھی تھا۔
