میڈرڈ ۔2 اکٹوبر (سیاست ڈاٹ کام ) انٹرنیشنل ٹینس فیڈریشن نے ٹورنمنٹ کے دوران بال گرل کے لیے نازیبا الفاظ استعمال کرنے اور ضابطہ اخلاق کی خلاف ورزی کی پاداش میں امپائر پر پابندی لگا کر ان کے خلاف تحقیقات کا آغاز کردیا ہے۔ یہ واقعہ گزشتہ ہفتے اٹلی میں جاری اے ٹی پی کے مردوں کے ٹورنمنٹ کے دوسرے میچ کے دوران پیش آیا جبکہ اسی میچ کے دوران امپائر ایک اور کھلاڑی کے خلاف ضابطہ اخلاق کی خلاف ورزی کے مرتکب بھی قرار پائے۔سوشل میڈیا پر شائع ویڈیو میں امپائرگیان لوکا موسکاریلا کو بال گرل کے خلاف نازیبا زبان اور ذومعنی الفاظ کا استعمال کرتے ہوئے دیکھا جا سکتا ہے۔ یہ واقعہ چیلنجر ٹور میں پیڈرو سوزا اور اینریکو دلا ویلے کے میچ کے دوران پیش آیا جہاں انہوں نے ایک ٹوائلٹ بریک کے دوران کھلاڑی کی غیرموجودگی میں دوسرے کی حوصلہ افزائی کی اور اسے ہدایات بھی دیں۔ اے ٹی پی کی جانب سے جاری بیان میں کہا گیا کہ ہمیں پیڈرو سوزا اور اینریکو دلا کے درمیان میچ میں پیش آئے واقعات کے بارے میں علم ہے، جیسے ہی ہمیں اس بارے میں علم ہوا تو ہم نے فوری طور پر موسکاریلا کو ٹورنمنٹ سے برطرف کردیا ۔ بیان میں کہا گیا کہ موسکاریلا کو عبوری طور پر معطل کردیا گیا ہے اور تفتیش شروع کردی گئی ہے۔ یہ پہلا موقع نہیں کہ کسی ٹینس امپائر کو ضابطہ اخلاق کی خلاف ورزی پر معطلی اور سزا کا سامنا کرنا پڑا ہو بلکہ اس سے قبل گزشتہ سال یو ایس اوپن میں آسٹریلیا کے نک کریگوس کی حوصلہ افزائی پر امپائر محمد لاحیانی پر 2سال کی پابندی عائد کردی گئی تھی۔
ہالینڈ ہاکی ٹیم کا دورہ پاکستان متوقع
دوبئی ۔2 اکٹوبر (سیاست ڈاٹ کام ) ہالینڈ نے پاکستان میں انٹر نیشنل ہاکی مقابلوں کی بحالی کے سلسلے میں اپنے مکمل تعاون کا اعلان کیا ہے۔ پاکستان میں ہالینڈ کے سفیر واوٹر پلمپ نے پاکستان ہاکی فیڈریشن کے صدر بریگیڈئیر(ر) خالد کھوکھر سے ملاقات کی اور اپنی ٹیم کو پاکستان بھیجنے کی یقین دہانی کروائی اورکہا کہ جلد اس حوالے سے تاریخ کو حتمی شکل دی جائے گی، ملاقات میں دونوں ملکوں میں ہاکی کے فروغ کیلئے تبادلہ پروگرام پر بھی اتفاق ہوا۔