حیدرآباد۔ کورونا سے باپ کی موت کے بعد پریشان حال بچوں کی مدد کرنے کی تلنگانہ کے وزیر انفارمیشن ٹکنالوجی کے تارک راما راو نے کلکٹر کو ہدایت دی ہے ۔جگتیال ضلع کے ملیال منڈل کے اوگلاپور دیہات سے تعلق رکھنے والا ستیا دو ماہ پہلے خلیجی ملک سے واپس آیا جہاں وہ ملازمت کرتا تھا۔وہ کورونا سے متاثر ہوگیا اور 4جون کو اس کی موت ہوگئی جس کے بعد اس کے بچے یتیم ہوگئے ۔ان کی یہ حالت دیکھ کر سائی کرن نامی نوجوان نے وزیر تارک راما راو کو ٹوئیٹ کیا۔انہوں نے ساتھ ہی ان بچوں کا ایک ویڈیو بھی پوسٹ کیا۔اس ٹوئیٹ پر ردعمل ظاہر کرتے ہوئے تارک راماراو نے ان تین بچوں کی فوری مدد کرنے کی چپہ ڈنڈی کے رکن اسمبلی روی کشور اور ضلع کلکٹرکو ہدایت دی۔انہوں نے کلکٹر سے خواہش کی کہ فوری طور پر عہدیداروں کی ایک ٹیم ان بچوں کے پاس بھیجی جائے اور اس بات کو یقینی بنایاجائے کہ ان کی بہتر طورپر دیکھ بھال ہو۔
