اگرتلہ، 02 فروری (یو این آئی) تریپورہ میں اپوزیشن نے مرکزی بجٹ 27-2026 کی مذمت کرتے ہوئے اسے ’سماجی و اقتصادی ترقی کے لیے آفت‘ قرار دیا ہے ۔ اپوزیشن جماعتوں، مارکسسٹ کمیونسٹ پارٹی (سی پی آئی ایم) اور کانگریس نے سماج کے غریب اور پسماندہ طبقات پر مرکزی بجٹ کے اثرات پر مایوسی کا اظہار کیا۔ بجٹ پر ردعمل دیتے ہوئے ، قائد حزب اختلاف اور سی پی آئی ایم کے ریاستی سکریٹری جتیندر چودھری نے کہا کہ بجٹ عام شہریوں یا مزدور طبقے کو تقریباً کوئی راحت نہیں دیتا۔ چودھری نے کہا کہ ہر سال، حکومت کئی تجاویز کے ساتھ بجٹ پیش کرتی ہے ۔ تاہم، گزشتہ 10-11 سالوں میں، یہ پالیسیاں زیادہ تر لوگوں کے لیے مایوس کن رہی ہیں۔ انہوں نے گزشتہ برسوں میں شروع کی گئی اہم اسکیموں کے لیے فنڈنگ نہ بڑھانے پر بھی حکومت کو سخت تنقید کا نشانہ بنایا۔ انہوں نے کہا کہ یہ ایک عوام دشمن بجٹ ہے اور ایک ایسا قدم ہے جو آنے والے سالوں میں ہندوستانی معیشت کو مزید کمزور کر سکتا ہے ۔
