لکھنؤ: اتر پردیش کانگریس کے صدر برج لال کھابری نے عام بجٹ کو عوام کے مفادات پر حملہ قرار دیتے ہوئے کہا کہ مرکزی حکومت نے ایک بار پھر بجٹ کے ذریعہ جملوں کو چھپانے کی کوشش کی ہے ۔ کھابر ی نے چہارشنبہ کو کہا کہ بجٹ مکمل طور پر متوسط طبقے ، مزدوروں، کسانوں، نوجوانوں، خواتین اور طلباء کے خلاف ہے ۔ بجٹ میں کسانوں کے ایم ایس پی کی بات نہیں کی گئی ہے ۔ ریلوے کو مکمل طور پر نظر انداز کر دیا گیا ہے۔ آدھی سے زیادہ آبادی دیہی علاقوں میں رہتی ہے لیکن ان کیلئے کچھ نہیں کیا گیا۔ یہ انتہائی مایوس کن بجٹ ہے ۔ ٹیکس سلاب میں تبدیلی اچھی ہے لیکن حکومت بتائے کہ غریبوں، کسانوں اور بیروزگاروں کو کیا دیا گیا ہے۔ ریاستی کانگریس صدر نے کہا کہ یہ بدقسمتی کی بات ہے کہ وزیر خزانہ نے ہر غریب کیلئے مکان، کسانوں کی آمدنی دوگنی کرنے ، بلٹ ٹرین، نوجوانوں کیلئے سالانہ دو کروڑ نوکریاں، خواتین کی حفاظت جیسے بڑے وعدوں پر کچھ نہیں کہا۔ ایک طرف جہاں بجٹ چند بڑے سرمایہ داروں پر مرکوز ہے وہیں دوسری طرف بجٹ مکمل طور پر مایوسی کا شکار ہے اور ملک کی ترقی کو کھائی میں لے جانے والا ہے۔اس بجٹ سے عوام کی توقعات خاک میں مل گئیں۔ مہنگائی، تعلیم، ادویات، کسانوں کے مسائل جوں کے توں ہیں۔ بجٹ میں ان کیلئے کچھ نہیں رکھا گیا۔ مجموعی طور پر یہ بجٹ کھوکھلا اور عام عوام کے ساتھ دھوکہ ہے ۔
