اپنی ہی پارٹی کی حکومت سے ناراض بی جے پی کے رکن پارلیمان ورون گاندھی نے کہا ہے کہ وہ بدعنوانی میں ملوث اہلکاروں کے خلاف کارروائی کے لیے یوگی حکومت کے سامنے ہاتھ نہیں جوڑیں گے بلکہ ایسے افسران کی گرفتاری کے لئے عدالت سے مدد لی جائے گی۔ورون گاندھی اپنے پارلیمانی حلقہ پیلی بھیت کے دو روزہ دورے پرگئے ہوئے تھے ,جہاں جمعہ کو مارکیٹ کمیٹی کا معائنہ کرنے گئے تھے۔ انہوں نے بتایا کہ کسان بدحالی کے باعث دلالوں کے ذریعے اپنا اناج بیچنے پر مجبور ہیں۔ معائنہ کے دوران انہوں نے وہاں موجود ڈپٹی آر ایم او گیان چند ورما اور منڈی ملازمین کو تنبیہ کرتے ہوئے کہا کہ اگر کسانوں پر مظالم ڈھائے گئے تو وہ اب حکومت کے سامنے ہاتھ پاؤں نہیں جوڑیں گے، سیدھا عدالت جائیں گے اور سب کو گرفتار کروائیں گے۔
