واشنگٹن، 10 نومبر (یو این آئی) امریکی صدر ڈونالڈ ٹرمپ نے برطانوی نشریاتی ادارے بی بی سی پر سخت تنقید کی ہے ۔ ٹرمپ نے بی بی سی کے ڈائریکٹر جنرل کے استعفے کے بعد تروتھ سوشل پر ایک بیان جاری کیا ہے جس میں امریکی صدر نے بی بی سی پر سخت تنقید کرتے ہوئے اس پر الزام لگایا کہ ادارے میں بدعنوان صحافی کام کر رہے ہیں جنہوں نے میرے خطاب کو مسخ کیا۔ ٹرمپ نے اپنے سوشل میڈیا پلیٹ فارم ٹروتھ سوشل پر لکھا کہ بی بی سی میں کرپٹ صحافیوں کا انکشاف ہو چکا ہے یہ انتہائی بے ایمان لوگ ہیں جنہوں نے امریکی صدارتی انتخابات میں مداخلت کی کوشش کی۔ امریکی صدر نے کہا کہ یہ صحافی ایک ایسے ملک سے تعلق رکھتے ہیں جسے ہم اپنا قریبی اتحادی سمجھتے ہیں اور یہ جمہوریت کیلئے خطرناک بات ہے ۔ واضح رہے کہ یہ تنازعہ اس دستاویزی ڈاکیومنٹری سے جڑا ہے جو بی بی سی نے امریکی صدارتی انتخابات سے ایک ہفتہ قبل نشر کی تھی۔ اس ڈاکیومنٹری میں 6 جنوری 2021 کے خطاب کے حصے جوڑ توڑ کر پیش کیے گئے تھے جس میں ٹرمپ پر الزام لگایا گیا تھا کہ انہوں نے اپنے حامیوں کو کیپیٹل ہل پر حملے کے لیے اکسانے کی کوشش کی تاکہ جو بائیڈن کے خلاف انتخابی شکست کے باوجود اقتدار میں رہ سکیں۔
