برازیلیا ،یکم اکتوبر(سیاست ڈاٹ کام) برازیل کی ایک عدالت نے کسی وقت برازیل کے سب سے امیر شخص رہے آئیک بتستا کو ’انسائڈر ٹریڈنگ‘ معاملہ میں 8 سال اور سات ماہ قید کی سزا سنائی ہے ۔مقامی اخبار‘ او گلوبو’ نے اپنی رپورٹ میں کہا ہے کہ ریو ڈی جینرومیں واقع اعلیٰ وفاقی عدالت نے بتستا کو پیر کو ’انسائڈر ٹریڈنگ‘ معاملہ میں مجرم پایا۔62 سالہ بتستا کو اپنی جہاز بنانے والی کمپنی او ایس ایکس میں شیئرفروخت کرنے کے لئے مارکیٹ میں جوڑتوڑ کرنے اور خفیہ معلومات کو استعمال کرنے کا مجرم ٹھہرایا گیا۔ عدالت نے بتستا کو 2.85 ملین ڈالر کا جرمانہ ادا کرنے کا بھی حکم دیا ہے ۔قابل ذکر ہے کہ بتستا کو سال 2018 میں سرکاری ٹھیکہ حاصل کرنے کے لئے لاکھوں ڈالر کی رشوت دینے کے الزام میں 30 سال قید کی سزا سنائی گئی تھی۔
