نئی دہلی: دہلی پولیس نے ریسلنگ فیڈریشن آف انڈیا کے سبکدوش صدر اور بی جے پی رکن پارلیمنٹ برج بھوشن شرن سنگھ کے خلاف چارج شیٹ دائر کر دی ہے۔ پولیس نے چارج شیٹ میں کہا ہے کہ برج بھوشن کیخلاف جنسی طور پر ہراساں کرنے، پیچھا کرنے اور چھیڑ چھاڑ کے جرائم کیلئے قانونی چارہ جوئی کی جا سکتی ہے اور اس پر سزا دی جاسکتی ہے۔پولیس نے چارج شیٹ میں دفعہ 506 (مجرمانہ دھمکی)، 354 (عورت کی عفت کو مجروح کرنا)، 354 اے (جنسی طور پر ہراساں کرنا) اور 354 ڈی (پیچھا کرنا) کے تحت الزامات عائد کئے ہیں اور کہا ہے کہ ایک معاملے میں تو برج بھوشن کی جانب سے بار بار ہراسانی کی گئی ہے۔رپورٹ میں مزید کہا گیا کہ دہلی پولیس نے عدالت سے برج بھوشن اور گواہوں کو طلب کرنے کی درخواست کی ہے۔ چارج شیٹ کے مطابق پولیس نے 108 گواہوں سے بات کی، جن میں سے 15 نے پہلوانوں، کوچیس اور ریفریوں سمیت پہلوانوں کے الزامات کی تصدیق کی۔برج بھوشن کیخلاف چارج شیٹ میں جن الزامات کا ذکر کیا گیا ہے ان میں سے ایک میں کہا گیا کہ میں ہوٹل میں رات کے کھانے کیلئے گئی تھی۔ ملزم (برج بھوشن ) نے مجھے اپنے کھانے کی میز پر بلایا۔ اپنا ہاتھ میری چھاتی پر رکھا، مجھے پکڑا اور پھر اپنا ہاتھ میرے پیٹ پرپھیرا۔بار بار 3۔4 مرتبہ، ڈبلیو ایف آئی کے دفتر میں، اس نے میری اجازت کے بغیر مجھے میری ہتھیلی، گھٹنے، رانوں اور کندھوں پر نامناسب طریقے سے چھوا اور بھی نازیبا حرکتیں کیں۔