لندن: برطانیہ کے بادشاہ چارلس سوم میں کینسر کی تشخیص ہوئی ہے ۔ بکنگھم پیلس سے جاری بیان میں بتایا گیا ہیکہ ستمبر 2022 میں اپنی والدہ ملکہ الزبتھ کی موت کے بعد بادشاہ بننے والے شاہ چارلس اپنے علاج کے بارے میں مکمل طور پر مثبت رویہ رکھتے ہیں اور جلد از جلد دوبارہ عوامی ذمہ داریاں مکمل طور پر نبھانے کے منتظر ہیں۔شاہ چارلس نے گزشتہ ماہ اسپتال میں 3 راتیں گزاری تھیں جہاں ان کے بڑھے ہوئے پروسٹیٹ کا آپریشن کیا گیا تھا۔اسپتال میں دوران علاج کینسر کی تشخیص ہوئی، بیان میں اس حوالے سے مزید تفصیلات نہیں بتائی گئیں کہ بادشاہ میں کس قسم کے کینسر کی تشخیص ہوئی ہے ، تاہم شاہی خاندان کے ذرائع نے بتایا کہ یہ پروسٹیٹ کینسر نہیں ہے ۔بادشاہ نے پیر سے باقاعدہ علاج شروع کر دیا ہے ، اس دوران انہیں ڈاکٹرز کی جانب سے اپنی تمام عوامی مصروفیات ملتوی کرنے کی تجویز دی گئی ہے ، اس پورے عرصے کے دوران وہ معمول کے مطابق ریاستی امور اور سرکاری کاغذی کارروائی جاری رکھیں گے ۔برطانوی وزیر اعظم رشی سوناک نے ‘ایکس’ پر بادشاہ چارلس کیلئے اپنی نیک تمناؤں کا اظہار کیا۔
انہوں نے کہا کہ مجھے کوئی شک نہیں ہے کہ وہ عنقریب مکمل صحتیاب ہوجائیں گے اور میں جانتا ہوں کہ پورا ملک ان کیلئے نیک خواہشات کا اظہار کرے گا۔