لندن : برطانوی وزیراعظم سر کیئر سٹارمر نے 10 ڈاؤننگ سٹریٹ کے دروازے مسلم کمیونٹی کے افطار کیلئے کھول دیئے۔ وزیراعظم کی سرکاری رہائش گاہ 10 ڈائوننگ سٹریٹ میں منعقدہ افطار میں شرکاء کو روزہ کھولنے کیلئے کھجوریں پیش کی گئیں۔ اس موقع پر سر کیئر سٹارمر کا شرکاء سے خطاب کرتے ہوئے کہنا تھا کہ آج ملک کے متاثر کن برطانوی مسلم نوجوانوں کو افطار کیلئے خوش آمدید کہنے کا موقع ملا، ان کے ساتھ روزہ کھولنا میرے لیے اعزاز ہے۔ انہوں نے کہا کہ ڈائوننگ سٹریٹ کی عمارت سے مسلمانوں کا بھی اتنا تعلق ہے جتنا کہ کسی اور کا۔ افطار میں جسٹس سیکریٹری اور لارڈ چانسلر شبانہ محمود، فیتھ منسٹر لارڈ واجد خان، لیڈر برینٹ کونسل کونسلر محمد بٹ سمیت برطانوی فوج میں خدمات سرانجام دینے والی خواتین اور مختلف شعبوں میں اعلیٰ خدمات سرانجام دینے والے نوجوان بھی شریک ہوئے۔
