نئی دہلی : حکومت نے ہند نے آج برطانوی ہائی کمشنر کو طلب کیا اور برطانیہ کے ایوان زیریں ’’دارالعوام ‘‘ میں برطانوی ایم پیز کے ایک گوشہ کی جانب سے ہندوستان میں جاری کسان احتجاج پر ’غیر ضروری ‘ اور ’تنازعہ پیدا کرنے والی ‘ بحث کے انعقاد پر شدید احتجاج درج کرایا۔ معتمد خارجہ ہرش وردھن شرنگلا نے برطانوی ہائی کمشنر برائے ہند سے کہا کہ اس طرح کی بحث کسی اور جمہوری ملک کی سیاست میں ’’سنگین مداخلت‘‘ کے مترادف ہے۔ انڈین مشن نے نشاندہی کی کہ برٹش میڈیا کے بشمول بیرونی ذرائع ابلاغ کے نمائندوں نے کسانوں کا احتجاج بہ نفس نفیس دیکھا ہے جس سے پتہ چلتا ہے کہ انڈیا میں میڈیا آزاد ہے۔
