لندن؍ ٹوکیو: برطانیہ اور جاپان نے آزاد تجارت کے معاہدہ پر دستخط کر دیئے ہیں۔ ٹوکیو میں آج جمعہ کو منعقدہ ایک تقریب میں برطانوی وزیر تجارت لز ٹروس اور جاپانی وزیر خارجہ ٹوشیمٹسو موٹیگی نے اس معاہدے پر دستخط کیے۔ برطانیہ کے یورپی یونین سے اخراج کے بعد یہ کسی بھی ملک کے ساتھ طے کی گئی آزاد تجارت کی پہلی ڈیل ہے، جسکے سبب ٹروس نے اسے تاریخی قرار دیا۔ اس معاہدہ کے نتیجے میں جاپان اور برطانیہ کی باہمی تجارت میں 15 بلین پاؤنڈ کا اضافہ ہو گا۔ علاوہ ازیں جاپان میں کام کرنے والی برطانوی کمپنیوں کیلئے بھی کافی آسانیاں پیدا ہوں گی۔