لندن: برطانوی پولیس نے ایسکس کی ایک مسجد کے اندر آگ لگانے پر دو کم عمر نوجوانوں کو گرفتار کیا ہے اور شبہ ہیکہ یہ ایک نسل پرستی پر مبنی واقعہ ہے۔منگل کو پیش آئے واقعہ کے بعد ہارلو میں واقع نارتھ بروکس مسجد میں ایمرجنسی سرویسز کو طلب کیا گیا۔ ایسکس پولیس کا کہنا ہیکہ واقعہ میں کوئی شخص زخمی نہیں ہوا اور آگ پر قابو پا لیا گیا۔ دونوں نوجوان کو حراست میں لیکر تفتیش جاری ہے۔مسجد کے سکریٹری جمال الدین نے کہا کہ ’ہم مکمل طور پر سکتے میں ہیں۔‘ ان کا کہنا تھا کہ آگ سے مسجد کے قالین اور پردے جل گئے ۔ جمال الدین نے بروقت کارروائی پر امدادی ٹیموں کی کارکردگی کی تعریف کی۔ہم یہاں بہت طویل عرصہ سے ہیں اور ہمارے ساتھ ایسا پہلے کبھی نہیں ہوا۔اس مسجد میں ایک ہفتے کے دوران تقریباً 700 افراد نماز پڑھنے آتے ہیں اور جمعہ کو نمازیوں کی تعداد تقریباً 300 تک پہنچ جاتی ہے۔
