لندن، 25 مارچ (سیاست ڈاٹ کام) برطانیہ میں کورونا وائرس (کووڈ -19) سے مرنے والوں کی تعداد بڑھ کر 422 ہو گئی ہے ۔برطانیہ کی وزارت صحت نے منگل کو ایک بیان جاری کرکے بتایا کہ گزشتہ 24 گھنٹوں کے دوران کورونا وائرس کے 1427 نئے کیس سامنے آئے ہیں جس سے ملک میں کوروناوائرس متاثرہ افراد کی تعداد بڑھ کر 8077 ہو گئی ہے ۔برطانیہ میں ایک دن میں کوروناوائرس سے 87 افراد کی موت ہوئی ہے ۔ برطانیہ میں اب تک 90 ہزار436 لوگوں کی کورونا کی تشخیص کی جا چکی ہے جس میں 8077 افراد متاثر پائے گئے ہیں۔برطانیہ کے ہیلتھ سکریٹری میٹ ہین کاک نے منگل کو ایک پریس بریفنگ میں بتایا کہ اس عالمی وبا سے نمٹنے کے لئے نمائش سینٹر ایکسل میں چار ہزار بستروں کی صلاحیت والا ایک عارضی اسپتال بنایا گیا ہے ۔برطانیہ میں ضرورت مند لوگوں تک دواوں سمیت دیگر ضروری چیزیں پہنچانے کے لئے دو لاکھ 50ہزار رضاکاروں کی ایک ٹیم تیار کرنے کا منصوبہ بنایا جارہاہے ۔ کورونا وائرس کے پھیلاو کو کم کرنے کے لئے برطانیہ کی حکومت نے رٹائرڈ 11 ہزار 500 طبی عملہ کو واپس بلانے کا فیصلہ کیا ہے جس میں 2660 ڈاکٹر اور 6147 نرسیں شامل ہیں۔ اس کے علاوہ 18000 میڈیکل طلبا -طالبات بھی اس ہنگامی صورت حال سے نمٹنے میں مدد کریں گے ۔کورونا وائرس کے بحران سے نمٹنے کے لئے برطانیہ میں مکمل طور پر لاک ڈاون کے اعلان کے علاوہ کئی دیگر سخت اقدامات کئے جا رہے ہیں۔
جنوبی کوریا نے وبا پر قابو پانے کیلئے کیا کیا؟
لندن ۔ 25 ۔ مارچ (سیاست ڈاٹ کام ) جنوبی کوریا کی ایبادی پانچ کروڑ افراد پر مشتمل ہے۔ ملک میں اب تک تقریباً نو ہزار لوگ نئے کورونا وائرس میں مبتلا ہوئے اور ایک سو بیس کے قریب اس انفیکشن کی وجہ سے انتقال کر گئے ہیں۔صورت حال پر قابو پانے کے لیے کئی ملکوں کے برعکس جنوبی کوریا نے مکمل لاک ڈاؤن اور شہریوں کی نقل و حرکت پر کڑی پابندیاں نہیں لگائیں، بلکہ اپنی توجہ متاثرہ افراد کی تشخیص اور انہیں محدود کرنے پر مرکوز کی۔حکام نے شہریوں میں مرض کی تشخیص کے لیے جگہ جگہ چیک پوائنٹ اور خیمے قائم کیے، جہاں جو چاہے جب چاہے کورونا کا مفت ٹیسٹ کرا سکتا ہے۔ملک میں اب تک قریب تین لاکھ لوگ اپنا ٹیسٹ کرا چکے ہیں اور روزانہ مزید بیس ہزار کے لگ بھگ شہری اپنا ٹیسٹ کرا رہے ہیں۔ اس سلسلے میں جنوبی کوریا نے گاڑی میں بیٹھے بیٹھے ’ڈرائیو تھرو‘ ٹیسٹنگ کی سہولت بھی متعارف کرائی۔