لندن:برطانیہ نے لاک ڈاؤن کے بعد ٹریفک لائٹ سسٹم استعمال کرتے ہوئے بین الاقوامی سفر بحال کرنے کے لئے نئے قواعد وضع کرنے کا اعلان کیا ہے۔ نیوز ایجنسی اے ایف پی کے مطابق برطانیہ کی جانب سے بین الاقوامی سفر بحال کرنے کی عارضی تاریخ 17 مئی طے کی گئی تھی۔ ہفتہ کو وزیراعظم کے دفتر سے جاری بیان میں کہا گیا تھا کورونا کے خطرے کو مدنظر رکھتے ہوئے ممالک کی سبز، زرد اور سرخ رنگوں میں درجہ بندی کی جائے گی۔ آج اس حوالے سے حکومت نے تفصیلات فراہم کی ہیں۔ برطانیہ نے دیگر ممالک کے سفر پر مکمل پابندی عائد کر رکھی ہے، تاہم چند وجوہات کی بنیاد پر سفر کرنے کی رعایت بھی دی گئی ہے۔