حیدرآباد۔/12 ڈسمبر، ( ایجنسیز ) برطانیہ کے لیسٹر شائر میں پیش آئے ایک خوفناک سڑک حادثہ میں آندھرا پردیش سے تعلق رکھنے والا ایک 32 سالہ طالب علم ہلاک ہوگیا جبکہ اے پی کے دیگر چار افراد بشمول ڈرائیور شدید زخمی ہوگئے جن کو علاج کے لئے ہاسپٹل میں شریک کروایا گیا ہے۔ پولیس کے مطابق یہ حادثہ منگل کی صبح 5:45 بجے کب ورتھ علاقہ میں اس وقت پیش آیا جب کار کے ڈرائیور نے اس کا توازن کھودیا اور کار سڑک سے اُتر کر گڑھے میں گر گئی۔ تین افراد کو شدید زخمی حالت میں ہاسپٹل میں شریک کیا گیا۔ اس حادثہ میں ہلاک چرنجیوی کا تعلق اونگول سے ہے جس نے حال ہی میں سوان سی یونیورسٹی سے گریجویشن کی تکمیل کی تھی۔ اس حادثہ میں وہ برسر موقع ہلاک ہوگیا۔ یہ کار گنٹور سے تعلق رکھنے والا 27 سالہ نوجوان چلا رہا تھا جس کو خطرناک ڈرائیونگ کے شبہ میں گرفتار کرلیا گیا۔ بعد ازاں اس کو ضمانت پر رہا کردیا گیا۔ گنٹور سے تعلق رکھنے والی ایک طالبہ پرنوی لیسٹر یونیورسٹی کی طالبہ ہے جو معمولی زخمی ہوئی اور اس کی حالت خطرہ سے باہر بتائی جاتی ہے۔ اونگول سے تعلق رکھنے والے ایک اور طالب علم بدری نے حال ہی میں اپنا گریجویشن مکمل کیا تھا۔ ہیما لالیا جس کا تعلق گنٹور سے ہے ناٹنگھم یونیورسٹی کی طالبہ ہے وہ لیسٹر میں مقیم تھی۔ اس حادثہ میں وہ شدید زخمی ہوگئی اور وہ ہاسپٹل میں زیر علاج ہے۔ ان تمام طلبہ کے خاندانوں کو اس حادثہ کی اطلاع دے دی گئی ہے۔ طلبہ نے کہا کہ وہ ویرہاوز میں کام کرنے کیلئے جارہے تھے۔ برسات کے موسم کے سبب کار کا ٹائر پھسل گیا کیونکہ کار کے بریک فیل ہوگئے تھے۔ کار کو بچانے کی کوشش کے طور پر کار چلانے والے طالب علم نے سڑک کے کنارے درخت سے کار کو ٹکرانے کی کوشش کی تاہم کار سڑک سے اُتر گئی اور گڑھے میں گر گئی۔
