کابل ۔ 14 فبروری (سیاست ڈاٹ کام) افغان حکام نے بتایا ہے کہ وسطی صوبے دائکنڈی میں برفانی تودوں کے گرنے سے کم از کم اکیس افراد مارے گئے ہیں۔ افغان وزارت برائے قدرتی آفات کے ترجمان کے مطابق برف تلے دبے سات افراد کی تلاش جاری ہے جبکہ بچائے گئے دس زخمیوں کو ہاسپٹل پہنچا دیا گیا ہے۔ ہلاک ہونے والے افراد کا تعلق دو مختلف خاندانوں سے بتایا گیا ہے۔ تودے گرنے سے پچاس مکانات بھی تباہ ہوئے ہیں۔ حکام کے مطابق ہلاکتوں میں اضافے کا خدشہ ہے کیونکہ خراب موسم کی وجہ سے دبے ہوئے افراد کی تلاش کے عمل میں مشکلات حائل ہیں۔ گزشتہ دو مہینوں میں موسلا دھار بارش اور شدید برفباری سے ہونے والی ہلاکتیں 72تک پہنچ گئی ہیں۔
