گاندھی بھون کے روبرو چیف منسٹر کا علامتی پتلہ جلایا گیا
حیدرآباد۔/12 جولائی، ( سیاست نیوز) کسانوں کو برقی سربراہی کے مسئلہ پر کانگریس کے خلاف بی آر ایس کی گمراہ کن مہم پر بطور احتجاج آج تمام اضلاع میں کانگریس کیڈر نے چیف منسٹر کے علامتی پتلے نذرآتش کئے۔ حیدرآباد میں مہیلا کانگریس کی صدر سنیتا راؤ کی قیادت میں گاندھی بھون کے روبرو احتجاج منظم کیا گیا جس میں مہیلا کانگریس کارکنوں کی کثیر تعداد نے شرکت کی۔ پولیس نے احتجاجی کارکنوں کو گاندھی بھون سے نکلنے کی اجازت نہیں دی جس پر گاندھی بھون کے احاطہ میں علامتی پتلہ نذرآتش کیا گیا۔ مہیلا قائدین نے الزام عائد کیا کہ برقی سربراہی کے مسئلہ پر ریونت ریڈی کے بیان کو توڑ مروڑ کر پیش کیا گیا ہے۔ ریونت ریڈی نے زرعی شعبہ کو مفت برقی سربراہی کی مخالفت نہیں کی بلکہ انہوں نے الزام عائد کیا کہ بی آر ایس حکومت کسانوں کو 8 گھنٹے برقی سربراہ کرنے میں ناکام ہوچکی ہے۔ بی آر ایس کی جانب سے کانگریس کے خلاف احتجاج کے جواب میں مختلف اضلاع میں کارکنوں نے جلوس نکالے۔ برقی سب اسٹیشنوں کے روبرو مظاہرے کئے گئے۔ کومپلی برقی سب اسٹیشن پر احتجاج کی قیادت پردیش کانگریس کمیٹی کے جنرل سکریٹری کے شیوا ریڈی نے کی۔ عادل آباد، نظام آباد میں بھی سینئر قائدین نے احتجاج میں حصہ لیا۔ کھمم کے کئی علاقوں میں کانگریس کارکنوں نے دھرنا منظم کیا۔ ورنگل کے علاوہ محبوب نگر میں بھی ضلع کانگریس صدور کی قیادت میں احتجاج منظم کیا گیا۔ر
