ممبئی۔5 مئی (سیاست ڈاٹ کام) ہٹمین کے نام سے مشہور ہندوستان کے اوپنر روہت شرما نے انکشاف کیا ہے کہ انہیں کیریئر میں آسٹریلیا کے فاسٹ بولر بریٹ لی اور جنوبی افریقہ کے ڈیل اسٹین نے اپنی بولنگ سے کافی پریشان کیا۔2007 میں ہندوستان کے لئے کریئر کا آغاز کرنے والے روہت نے کہا ہے کہ ان کے کیریئر کے ابتدائی دنوں میں انہیں لی اور اسٹین کی بولنگ سے پریشانی ہوتی تھی۔ ہندوستانی محدود اوورز کی ٹیموں کے نائب کپتان روہت نے اسٹار اسپورٹس کے شو کرکٹ کنکٹڈ میں کہا کہ میرے دو پسندیدہ بولر ہیں جنہیں میں کھیلنا نہیں چاہتا۔ ایک لی اور دوسرے اسٹین ہیں۔ میں کبھی ان دونوں کے خلاف کھیلنا پسند نہیں کرتا کیونکہ تیزی اور سوئنگ کی ایک ہی وقت میں سامنا کرنا کسی برے خواب جیسا ہے۔ہٹمین نے کہا کہ جب میں 2007 میں پہلی بار آسٹریلیا کے دورے پر گیا تو میچ کے ایک دن پہلے لی کی وجہ سے میں سو نہیں سکا۔ میں سوچ رہا تھا کہ لی کو کیسے کھیلوں گا جو مسلسل 150 کلومیٹر کی رفتار سے گیند کرتے ہیں۔انہوں نے کہا کہ 2007 میں لی کیریئر کے بہترین دور میں تھے۔ میں ان کے کھیلنے کے اسٹائل کو دیکھتا تھا اور نظر رکھتا تھا کہ وہ مسلسل 150-155 کی رفتار سے گیند کرتے ہیں۔ میرے جیسے نوجوان کھلاڑی کی لی جیسے خطرناک بولر کو کھیلنے کے بارے میں سوچنے سے ہی نیند ٹوٹ جاتی تھی۔روہت نے 2007 میں آئر لینڈ اور جنوبی افریقہ کے خلاف سہ رخی سیریز سے ونڈے میں ڈیبو کیا تھا۔ 33 سالہ روہت دنیا کے واحد ایسے کھلاڑی ہیں جنہوں نے ونڈے میں تین بار ڈبل سنچری لگائی ہے۔ ان کے نام ونڈے کرکٹ میں سب سے زیادہ 264 رنز بنانے کا ریکارڈ ہے جو انہوں نے سری لنکا کے خلاف کولکتہ میں بنایا تھا۔اوپنر نے آسٹریلیا کے جوش ہیزل ووڈ کی تعریف کی اور انہیں لائن لینتھ کو لے کر کافی ڈسپلن بتایا۔ قابل ذکر ہے کہ ہندوستان کو اس سال کے آخر میں آسٹریلیا کا دورہ کرنا ہے جہاں اسے چار ٹسٹ میچوں کی سیریز کھیلنی ہے۔روہت نے کہا ہے کہ انہیں آسٹریلیا دورے کے دوران ہیزل ووڈ کے خلاف کھیلنے کے لئے ذہنی طور پر تیار ہونا پڑے گا۔ انہوں نے کہا کہ اس وقت ٹسٹ کرکٹ میں میں ہیزل ووڈ کے خلاف کھیلنا پسند نہیں کروں گا کیونکہ وہ اپنی بولنگ میں کافی منظم ہیں اور لائن لینتھ سے بھٹکتے نہیں ہیں۔انہوں نے کہا کہ ہیزل ووڈ کبھی بھی آسان گیند نہیں پھینکتے۔ میں نے انہیں کئی بار دیکھا ہے اور اس بات کو سمجھا ہے۔ مجھے پتہ ہے کہ اگر میں آسٹریلیا کے دورے میں گیا تو مجھے ہیزل ووڈ کو کھیلنے کے لئے ذہنی طور پر تیار ہونا پڑے گا۔