بروسلز، 11 اپریل (سیاست ڈاٹ کام) یورپی یونین اور برطانیہ کے درمیان بریگزٹ کا عمل 31 اکتوبر تک ملتوی کرنے سے متعلق اتفاق ہوگیا ہے ۔ اس سے برطانیہ کی وزیر اعظم تھریسا مے کو بریگزٹ کے لئے پارلیمنٹ کی منظوری لینے کا زیادہ وقت مل گیا ہے ۔برطانیہ کے اخبار ‘دی گارجین’ کے مطابق یوروپی یونین کے رہنماؤں کے درمیان چھ گھنٹے تک جاری رہی میراتھن میٹنگ میں بریگزٹ کے لئے برطانیہ کی وزیر اعظم کو مزید وقت دینے کا فیصلہ کیا گیا۔ یوروپی کونسل کے صدر ڈونالڈٹسک نے اس ملاقات کے بعد کہا کہ ‘‘آج رات یوروپی کونسل نے یونائیٹیڈ کنگڈم (برطانیہ) کو 31 اکتوبر تک آرٹیکل ۔50 میں توسیع کرنے کا موقع دینے کا فیصلہ کیا ہے ۔ اس کا مطلب ہے کہ برطانیہ کے پاس اب چھ ماہ کا اضافی وقت ہے ۔ اس دوران پوری کارروائی برطانیہ کے ہاتھوں میں ہوگی’’۔ اس کے بعد محترمہ تھریسامے نے وزیر اعظم کے عہدے پر رہنے سے متعلق سبھی سوالات کو ٹالتے ہوئے کہا کہ اگر پارلیمنٹ بریگزٹ بل کو منظور کرتی ہے تو برطانیہ 22 مئی کو یوروپی یونین سے علیحدہ ہو سکتا ہے ۔ محترمہتھریسامے نے بریگزٹ کو نافذ کرنے میں ناکام رہنے سے متعلق ممبران پارلیمنٹ پر تنقید بھی کی۔
