لندن، 4 ستمبر (سیاست ڈاٹ کام) برطانیہ کے وزیر اعظم بورس جانسن نے کہا ہے کہ اگر پارلیمنٹ میں بریگزٹ کو روکنے کے لئے ووٹنگ ہوتی ہے تو وہ جلد سے جلد انتخابات کا اعلان کریں گے ۔اس سے پہلے منگل کی رات برطانیہ کی پارلیمنٹ میں مسٹر جانسن کی بریگزٹ پالیسی (برطانیہ کے یوروپی یونین سے باہر ہونے کے عمل) کو اس وقت زبردست جھٹکا لگا جب حکمران کنزرویٹو پارٹی کے باغی ممبران پارلیمنٹ نے اپوزیشن ممبران پارلیمنٹ کے ساتھ مل کر حکومت کو پارلیمنٹ میں شکست دے دی ۔اس سال جولائی میں وزیر اعظم کے عہدہ سنبھالنے کے بعد مسٹر جانسن کا پارلیمنٹ میں یہ پہلا امتحان تھا، لیکن بریگزٹ کے معاملہ پر ایک قرار داد پر ووٹنگ ہوئی جس میں صرف 301 ممبران پارلیمنٹ نے ان کی حمایت کی جبکہ 328 ممبران پارلیمنٹ نے ان کے خلاف ووٹ دیا۔