نئی دہلی ۔ /25 اپریل (سیاست ڈاٹ کام) وزارت فینانس نے 29 انشور نس کمپنیوں اور 9 حصص اداروں کو اپنے کسٹمر کے بارے میں جانکاری (KYC) حاصل کرنے کے مقصد سے آدھار نمبر وصول کرنے کی اجازت دی جارہی ہے ۔ اس اقدام کا مقصد غیرقانونی رقمی لین دین کا سدباب اور سرمایہ کو فرضی کمپنیوں میں مشغول کرنے سے روکنا ہے ۔ فینانس سکریٹری اجئے بھوشن پانڈے نے کہا کہ اس ضمن میں وزارت نے دو اعلامیہ جاری کئے ہیں جو ان ادارہ جات کو آدھار ایکٹ کے تحت آدھار شناخت کی سرویس سے استفادہ کرنے کی اجازت دیتے ہیں ۔ اس ضمن میں ضروری معیاری سکیورٹی اور حق رازداری سے متعلق اقدامات کا خیال رکھنا ہوگا ۔ اس سے ان اداروں کو بروقت اپنے کسٹمرس کے بارے میں رائے قائم کرنے میں مدد ملے گی اور لین دین کی لاگت میں کمی بھی آئے گی ۔ پانڈے ریونیو سکریٹری بھی ہیں ۔ انہوں نے کہا کہ یہ اقدام کسٹمرس یا سرمایہ کاروں چھوٹے ہوں یا دیگر سب کیلئے بھی فائدہ مند ثابت ہونے کی توقع ہے ۔ کیونکہ انہیں (KYC) کیلئے کاغذی شکل میں ثبوت یا ڈاکٹومنٹس پیش کرنا نہیں پڑے گا ۔ منی لانڈرنگ کے خلاف بھی اسے اقدام سے بڑی مدد ملے گی ۔
