برسلز : نمازیوں میں کورونا وائرس کی موجودگی کے سبب بلجیم کے علاقے میخلن میں تین مساجد کو عارضی طور پر بند کر دیا گیا۔ تفصیلات کے مطابق دارالحکومت برسلز اور بلجیم کے دوسرے بڑے شہر اینٹورپ کے درمیان واقع شہر میخلن میں مسلمانوں کی تین مساجد ہیں ،جہاں ہفتہ رفتہ میں نمازیوں کے کورونا ٹیسٹ کئے گئے جو مستقل آنے والے نمازیوں کے مثبت آئے جس کے بعد تینوں مساجد ، مسجد میخلن، البراق مسجد اور الاخلاص مسجد کی انتظامیہ نے مشترکہ طور پر فیصلہ کیا کہ تینوں مساجد عارضی طور پر بند کردی جائیں۔ دو ہفتوں کے بعد نئی صورتحال کا جائزہ لے کر مساجد کو کھولنے کا فیصلہ کیا جائے گا۔ یادرہے کہ یہ بلجیم کی پہلی عبادت گاہیں ہیں جنہیں کورونا وائرس کی موجودگی کے باعث بند کیا گیا۔ دوسری جانب مساجد کی انتظامیہ اس صورتحال کا مستقل حل نکالنے کے حوالے سے تشویش میں مبتلا ہوگئی ہے۔