چیف سکریٹری ‘ ڈی جی پی ‘ ضلع کلکٹرس اور دیگر عہدیداروں نے شرکت کی
حیدرآباد، /20 نومبر: (سیاست نیوز) بلدیاتی انتخابات کی تیاریوں کے سلسلے میں آج ریاستی الیکشن کمیشن سے ویڈیو کانفرنس کا انعقاد کیا گیا۔ اجلاس میں ریاستی الیکشن کمشنر رانی کمودنی، چیف سکریٹری رام کرشنا راؤ اور ڈائرکٹر جنرل پولیس بی شیو دھر ریڈی نے شرکت کی۔ ضلع کلکٹرز، پولیس عہدیدار اور دیگر محکموں کے افسران نے بھی ویڈیو کانفرنس میں شرکت کی۔ ڈی جی پی نے کہا کہ گزشتہ انتخابات کے تجربات کو مدنظر رکھتے ہوئے اگر ہر ضلع میں انتخابات تین مرحلوں میں کرائے جائیں تو امن و قانون برقرار رکھنا نسبتاً آسان ہوگا۔ انہوں نے کہا کہ مختلف علاقوں میں انتخابات کے درمیان دو دن کا وقفہ رکھا جانا چاہیے تاکہ عملے اور سیکورٹی فورسز کو مناسب وقت مل سکے اور بندوبست کیا جا سکے۔ ڈی جی پی نے بتایا کہ سرپنچ انتخابات کے نتائج عموما شام کے وقت ہی آتے ہیں، جس کے بعد جلوسوں کے امکانات بڑھ جاتے ہیں، اس لیے دو دن کا وقفہ ضروری ہے۔ انہوں نے یقین دہانی کرائی کہ الیکشن کمیشن کی ہدایات کے مطابق سخت سیکیورٹی انتظامات کیے جائیں گے۔ انہوں نے حساس علاقوں پر خصوصی نظر رکھنے اور مشکوک افراد پر چوکس رہنے کی ضرورت پر زور دیا۔ ڈی جی پی کی تجاویز کے بعد الیکشن کمشنر نے ضلع کلکٹرز اور دیگر عہدیداروں کی رائے حاصل کی۔ کمیشن نے ہدایت دی کہ انتخابی عمل شفاف و غیر جانبدارانہ انجام پانے ضابطہ اخلاق کی خلاف ورزیوں کی شکایات کا فوری جائزہ لیا جائے اور تیز رفتار کارروائی کی جائے۔ اس مقصد کیلئے ریاستی سطح پر ریویو کمیٹی تشکیل دینے کا فیصلہ کیا گیا۔اجلاس میں اڈیشنل ڈی جی پی (لا اینڈ آرڈر) مہیش مرلیدھر بھاگوت ، ملٹی زون۔II ایڈیشنل ڈی جی پی ڈی ایس چوہان، ملٹی زون۔I آئی جی پی ایس چندر شیکھر ریڈی، اور اے آئی جی (لا اینڈ آرڈر) رمنا کمار نے بھی شرکت کی۔ب
