حکومت موجودہ بلدیہ کی کارکردگی سے مطمئن : مئیر حیدرآباد بی رام موہن کا دعوی
حیدرآباد 9 مارچ (سیاست نیوز) حیدرآباد میں مجلس بلدیہ عظیم تر حیدرآباد کے انتخابات قبل از وقت منعقد نہیں کئے جائیں گے بلکہ موجودہ بلدیہ اپنی معیاد مکمل کرے گی۔ مئیر جی ایچ ایم سی مسٹر بی رام موہن نے آج ایک پریس کانفرنس سے خطاب کرتے ہوئے یہ دعوی کیا اور کہا کہ مجلس بلدیہ عظیم ترحیدرآباد کے قبل از وقت انتخابات کی اطلاعات درست نہیں ہیں کیونکہ ریاستی حکومت جی ایچ ایم سی کی کارکردگی سے مطمئن ہے اور حکومت کی جانب سے شہر کی مجموعی ترقی کیلئے 10 ہزار کروڑ روپئے کی تخصیص ثبوت ہے کہ حکومت کی جانب سے شہر کی موجودہ جی ایچ ایم سی کی نگرانی میں ترقی کو یقینی بنایا جائے گا۔ مسٹر رام موہن نے بتایا کہ وزیر بلدی نظم و نسق مسٹر کے ٹی راما راؤ کی قیادت میں شہر کے ترقیاتی کاموں کی عظیم منصوبہ بندی کی جاچکی ہے اور حکومت سے بجٹ کی اجرائی کے ساتھ ہی ترقیاتی کاموں کا آغاز کیا جائیگا۔انہوںنے بتایا کہ درگم چیرو پر تعمیر کئے گئے کیبل برج کے کاموں کو مئی تک مکمل کرلیا جائے گا اور مئی کے اواخر تک اسے عوام کیلئے کھول دیا جائے گا۔ علاوہ ازیں شہر میں دیگر ترقیاتی منصوبوں کو جو تیار کیا گیا ان میں معیاری سفری سہولتوں کی فراہمی کے علاوہ شہر حیدرآباد کو عالمی معیار کے شہر میں تبدیل کرنے کے اقدامات شامل ہیں۔ انہوں نے کہا کہ شہر حیدرآباد کی ترقی کیلئے 10ہزار کروڑ کی تخصیص کو انتخابات سے مربوط نہیں کیا جانا چاہئے اور نہ ہی اس معاملہ کو قبل از وقت انتخابات کی تیاریاں قرار دی جانی چاہئے کیونکہ گذشتہ 6برسوں کے دوران شہر حیدرآباد کی ترقی کے لئے ریاستی حکومت کی جانب سے بجٹ مختص کیا جا رہاہے اور مجلس بلدیہ عظیم تر حیدرآباد کو ضرورت کے مطابق بجٹ کی اجرائی عمل میں لائی جا رہی ہے ۔ مسٹر بی رام موہن نے کہا کہ ریاستی حکومت نے جو بجٹ مختص کیا ہے اس کے ذریعہ شہر حیدرآباد میں تفریحی مقامات کی ترقی کے علاوہ شہر کی سڑکو ںکو بہتر بنانے کے اقدامات کئے جائیں گے تاکہ شہر حیدرآباد کو سیاحوں کی اولین پسند کا شہر بنایاجاسکے۔ انہو ںنے بتایا کہ حیدرآباد میں سڑکوں کی توسیع کے علاوہ دیگر اقدامات کے سلسلہ میں مسٹر کے ٹی راما راؤ نے جو منصوبہ تیار کیا ہے اور ماہرین کی جانب سے اس منصوبہ کو عملی جامہ پہنانے کے اقدامات کے سلسلہ میں جو سفارشات کی گئی ہیں ان کے مطابق ریاستی حکومت نے بجٹ 2020-21 میں حیدرآباد کی مجموعی ترقی کیلئے 10ہزار کروڑ کی تحصیص کا فیصلہ کیا ہے۔