کوئٹہ: بلوچستان کے ضلع مستونگ میں دشت روڈ پربلوچستان کانسٹیبلری کی بس پر آئی ای ڈی بم کے حملے میں 3 اہلکار شہید اور 18 زخمی ہوگئے ۔پولیس حکام کا کہنا ہے کہ دھماکہ دشت روڈ پر کنڈ مسوری کے قریب ہوا، دھماکہ موٹرسائیکل میں نصب ریموٹ کنٹرول بارودی مواد سے کیا گیا۔پولیس حکام کے مطابق بلوچستان کانسٹیبلری کے اہلکار ڈیوٹی سے واپس جارہے تھے ، واقعہ کے بعد فورسز کے اہلکار جائے وقوع پر پہنچ گئے جبکہ جاں بحق اور زخمی اہلکاروں کو ہاسپٹل منتقل کردیا گیا ہے ۔ڈی ایس پی مستونگ یونس مگسی کا کہنا ہے کہ مستونگ کا علاقہ کنڈ مسوری لیویز کی حدود میں آتا ہے تاہم دھرنے کے باعث ہمارے افسران نے پولیس اہلکاروں کو لیویز کے ساتھ ڈیوٹی دینے کے احکامات دیئے۔
اور ہمارے جوان روزانہ کی بنیاد پر ڈیوٹی کرکے واپس پولیس لائن مستونگ آجاتے تھے ۔انہوں نے بتایا کہ آج بھی 40 سے زائد اہلکار ڈیوٹی ختم کرکے پولیس بس میں واپس آرہے تھے کہ موٹرسائیکل میں نصب ریمورٹ کنٹرول بم کے ذریعے نشانہ بنایا گیا، دھماکے میں 3 اہلکار شہید اور 18زخمی ہوگئے۔ بلوچستان پولیس کی ویب سائٹ کے مطابق بلوچستان کانسٹیبلری پولیس کا حصہ ہے ۔ترجمان بلوچستان حکومت شاہد رند کے مطابق مستونگ میں کنڈ مسوری کے قریب آر ٹی سی قلات سے اہلکاروں کو لے جانے والی بس پر آئی ای ڈی کا دھماکہ ہوا جس کے نتیجے میں بلوچستان کانسٹیبلری کے 3جوان شہید ہوئے اور 16زخمی ہوئے۔ ترجمان بلوچستان حکومت کے مطابق تمام زخمیوں کو ہاسپٹل منتقل کردیاگیا ہے ، جبکہ شدید زخمیوں کو کوئٹہ منتقل کیاجارہا ہے جن میں سے 2 اہلکاروں کی حالت تشویشناک ہے۔
