نئی دہلی۔26 اکٹوبر (سیاست ڈاٹ کام ) ہندوستانی بولنگ کوچ بھرت ارون نے کہا ہے کہ فاسٹ بولر جسپریت بمراہ کی پیٹھ کی تکلیف کے لئے ابھی سرجری کی ضرورت نہیں ہے اور وہ جلد ٹیم میں واپسی کر سکتے ہیں۔ بمراہ کے اگرچہ اب بھی گھریلو سیزن کے باقی مقابلوں میں کھیلنے کی توقع نہیں ہے جس میں اگلے تین ماہ میں بنگلہ دیش، ویسٹ انڈیز اور سری لنکا کے خلاف ہونے والی سریز شامل ہیں۔اس سے پہلے اکتوبر میں بمراہ نیشنل کرکٹ اکیڈمی کے چیف فیزیو تھراپسٹ اشیش کوشک کے ساتھ برطانیہ جاکر اپنی پیٹھ کے مسئلہ کو ماہرین سے رجوع بھی کیا تھا۔ ہندوستانی کرکٹ کنٹرول بورڈ نے اگرچہ بمراہ کی پیٹھ کی تکلیف کے بارے میں طور پر کوئی بیان نہیں دیا ہے۔ ارون نے اشارہ دیئے ہیںکہ بمراہ نیوزی لینڈ کے خلاف ٹسٹ سیریز میں واپسی کر سکتے ہیں۔ بمراہ کی غیر موجودگی کے باوجود ٹیم کو ان کی کمی محسوس نہیں ہو رہی ہے جس میں محمد سمیع، ایشانت شرما اور امیش یادو بولنگ میں کمال کا مظاہرہ کر رہے ہیں۔ جنوبی افریقہ کے خلاف 3-0 کی کلین سویپ میں امیش اور سمیع نے اہم شراکت نبھائی تھی۔سال 2015 سے ہی ارون ہندوستانی ٹیم کے ساتھ کام کر رہے ہیں اور امیش کی کارکردگی سے کافی متاثر ہیں جنہوں نے دو ٹسٹ میچوں میں 11 وکٹ لئے۔ انہوں نے کہاکہ وہ کافی مضبوط ہیں اور بیٹسمینوں کو کافی پریشان کرتے ہیں۔ وہ اچھے ریورس سوئنگ کرتے ہیں۔ وہ اور سمیع دونوں کافی جارحانہ ہیں۔ بولنگ کوچ نے آف اسپنر روی چندرن اشون اور رویندر جڈیجہ کی بھی تعریف کی۔
