نئی دہلی۔ یکم جنوری (سیاست ڈاٹ کام ) وزڈن کی دہے کی بہترین ٹی 20 بین الاقوامی ٹیم میں جگہ پانے والے ہندوستانی فاسٹ بولر جسپریت بمراہ 2019 کے یادگار سفر کے بعد نئے سال 2020 کو بھی نئی کامیابیوں سے دلچسپ اور کامیاب بنانا چاہتے ہیں۔ بمراہ نے ٹوئٹر پرکہا سال 2019 میرے لئے کامیابیوں، سبق، محنت اور میدان اور میدان کے باہر یادیں بنانے سے بھرا رہا تھا اور اب 2020 کے آنے والی چیلنجوں اور نئے سفر کیلئے کافی پرجوش ہو۔بمراہ سال 2019 میں تینوں ہی فارمیٹس میں کامیاب رہے تھے۔انہوں نے آسٹریلیا میں پہلی مرتبہ ٹسٹ سیریز جیتنے میں ٹیم کے لیے اہم کردار ادا کیا تھا اور ویسٹ انڈیز کے دورے میں وہ ہیٹ ٹرک لینے والے تیسرے ہندوستانی بولر بنے تھے۔ ان سے پہلے یہ کامیابی آف اسپنر ہربھجن سنگھ اور فاسٹ بولر عرفان پٹھان کے نام تھی۔ 26 سالہ بمراہ ساتھ ہی ونڈے درجہ بندی میں نمبر ایک بولر اور ٹسٹ کرکٹ کی درجہ بندی میں چھٹے نمبر پر ہیں اور ہندوستانی ٹیم کے بولنگ شعبہ کا اہم حصہ بھی ہیں۔ بمراہ نے ابھی تک ٹیم کی جانب سے 12 ٹسٹ، 58 ونڈے اور 42 ٹی 20 کھیلے ہیں۔ بمراہ فی الحال زخمی ہونے کی وجہ سے ٹیم سے باہر ہیں اور گوہاٹی میں پانچ جنوری کو سری لنکا کے خلاف شروع ہونے والی تین میچوں کی ٹوئنٹی 20 سیریز سے ہندوستانی ٹیم میں واپسی کریں گے۔ بمراہ کو آسٹریلیا کے خلاف تین ونڈے میچوں کی سیریز کے لیے بھی ٹیم میں شامل کیا گیا ہے۔ یادرہے کہ رواں برس ہندوستانی ٹیم جنوری میں آسٹریلیا اور سری لنکائی ٹیم کی محدود اوورس کی سیریز میں میزبانی کررہی ہے جس کے بعد آئندہ ماہ ٹیم کو نیوزی لینڈ کے سخت دورہ پر جانا ہے اور ان تمام مقابلوں میں بمراہ پھر ایک مرتبہ ٹیم میں اہم کردارادا کرسکتے ہیں۔
