کانپور ۔ ہندوستان اور بنگلہ دیش کے درمیان کانپور میں جاری سیریزکے دوسرے اور آخری ٹسٹ میچ کے حوالے سے ایک دلچسپ خبر سامنے آئی ہے کہ اسٹیڈیم میں بندروں کو داخل ہونے سے روکنے کے لیے لنگوروں کو تعینات کردیا گیا ہے۔ تفصیلات کے مطابق اتر پردیش کرکٹ اسوسی ایشن نے کانپور کے گرین پارک اسٹیڈیم میں جاری ہند۔ بنگلہ دیش ٹسٹ میچ کے دوران بندروں کو اسٹیڈیم میں داخل ہونے سے روکنے کے لیے انوکھا کام کیا ہے۔ بندر اسٹیڈیم میں آنے والے شائقین سے کھانے پینے کی چیزوں سمیت موبائل فون تک چھین کر لے جاتے ہیں جس کے لیے انتظامیہ نے لنگوروں کی خدمات حاصل کر لی ہیں۔ میچ کے لیے یوں تو اسٹیڈیم میں سکیورٹی گارڈز موجود ہیں تاہم بندروں سے حفاظت کے لیے مزید سکیورٹی بڑھائی گئی ہے۔ اسٹیڈیم کے ڈائریکٹر سنجے کپور نے کہا ہے کہ بندروں کے خطرے سے بچنے کے لیے ہم نے لنگوروں کی خدمات حاصل کی ہیں۔سنجے کپور نے مزید انکشاف کیا کہ اسٹینڈ میں موجود کیمرہ پرسن کو بندروں سے کھانے پینے کی اشیا چھین کر لے جانے کا خطرہ زیادہ ہوتا ہے۔
