کولکاتہ :سندیش کھالی بدامنی پر ترنمول کانگریس پر بی جے پی کی تنقید کے درمیان، ممتا بنرجی نے کہا کہ بنگال خواتین کے لیے سب سے محفوظ ریاست ہے۔ انہوں نے مزید کہا کہ خواتین یہاں اپنے مسائل کے بارے میں بات کرتی ہیں۔ عالمی یوم خواتین سے پہلے چیف منسٹرمغربی بنگال ممتا بنرجی نے جمعرات کو ایک ریالی کی قیادت کی۔ خواتین کے حقوق کیلئے نکالے گئے مارچ سے خطاب کرتے ہوئے ممتا بنرجی نے کہا کہ بنگال سب سے محفوظ ہے۔ ان کا یہ تبصرہ وزیر اعظم نریندر مودی اور بی جے پی کی جانب سے سندیش کھالی معاملہ پر حکمراں ترنمول کانگریس کو نشانہ بنانے کے جواب میں آیا ہے۔ انہوں نے کہا کہ اگر کچھ ظلم ہوتا ہے تو ہم ایکشن لیتے ہیں۔ ترنمول کانگریس کے لیڈروں کو بھی گرفتار ہونے سے نہیں بخشا جاتا۔ بی جے پی صرف ایک کام کرتی ہے ای ڈی اور سی بی آئی کو دھکیلنا، لیڈروں کو گرفتار کرنا اور الیکشن جیتنا۔ بنگال پر اتنا غصہ کیوں؟ اگر آپ (انتخابات) جیت سکتے ہیں تو (اپوزیشن) کو کیوں بدنام کریں گے؟ سندیش کھالی میںبدامنی پر ریاستی حکومت پر انگلیاں اٹھانے کے بعد خواتین نے ترنمول کانگریس کے رہنما شاہجہاں شیخ اور ان کے ساتھیوں پر زمینوں پر قبضے اور جنسی زیادتی کا الزام لگایا۔ بنرجی نے جواب دیا کہ بنگال خواتین کے لیے سب سے محفوظ ریاست ہے۔ انہوں نے مزید کہا کہ خواتین یہاں اپنے مسائل کے بارے میں بات کرتی ہیں۔
