کولکاتہ، 24 نومبر (یو این آئی) بہار اسمبلی انتخابات میں اپنی فیصلہ کن جیت سے پُرجوش بی جے پی کی مرکزی قیادت آئندہ مہینے سے مغربی بنگال میں 2026 کے اسمبلی انتخابات سے قبل ایک ہائی پروفائل مہم کی تیاری کر رہی ہے جس میں وزیر اعظم نریندر مودی اور مرکزی وزیر داخلہ امیت شاہ دونوں شامل ہوں گے ۔ پارٹی ذرائع کے مطابق جب تک کہ انتخابی کمیشن انتخابات کی تاریخوں کا اعلان نہیں کر دیتا ، ابتدائی منصوبے کے تحت ہر مہینے دو بڑے جلسے کرنے کا پروگرام ہے ایک ریلی سے وزیر اعظم اور دوسری سے وزیر داخلہ امیت شاہ خطاب کریں گے ۔بی جے پی ریاستی کمیٹی کے ایک سینئر رکن نے نام نہ بتانے کی شرط پر یواین آئی کو بتایا،”انتخاب کی تاریخوں کا اعلان ہونے کے بعد ان عوامی جلسوں کی تعداد بڑھ جائے گی۔ ” پارٹی مغربی بنگال میں بی جے پی کے پانچ علاقوں میں الگ الگ مرحلے میں اپنی مہم شروع کرنے کا منصوبہ بنا رہی ہے ۔ پارٹی ذرائع کے مطابق، بنگال یونٹ نے 13 یا 14 دسمبر کو ہُگلی ضلع کے آرام باغ میں ریلی کرنے کی اجازت کے لیے مقامی انتظامیہ سے رابطہ کیا ہے ۔ اگر وزیر اعظم کا دفتر اس تجویز کو منظوری دے دیتا ہے تو آرام باغ ریلی بی جے پی کی اسمبلی انتخابات کی مہم کا بامعنی آغاز کرے گی۔ امیت شاہ کے دسمبر کے آخر میں ریاست کا دورہ کرنے کی امید ہے اور 19 دسمبر کے بعد تیاریوں کا جائزہ لینے اور ریاستی یونٹ کو انتخابی حکمت عملی پر رہنمائی دینے کے لیے کولکاتہ میں میٹنگ ہو سکتی ہے ۔ اڈیشہ (2024) اور بہار (2025) میں مسلسل جیت کے بعد بی جے پی نے اپنا نعرہ اور تیز کر دیا ہے : ”2024 میں اڈیشہ اور 2025 میں بہار کے بعد، 2026 میں بنگال ہو گا!” سیاسی ماہرین کا کہنا ہے کہ مودی اورامیت شاہ دونوں کا اتنی جلدی یکجا ہونا اس بات کی طرف اشارہ کرتا ہے کہ یہ نعرہ صرف بیان بازی نہیں ہے ، بلکہ اس سے ظاہر ہوتا ہے کہ مرکزی قیادت بنگال کے مقابلے کے تئیں کس قدر سنجیدہ ہے ۔ ۔پارٹی نے حال ہی میں اپنی ڈیجیٹل رابطہ مہم کے لیے ایک ریاست کے لیے مخصوص ویب سائٹ شروع کی ہے ۔ خواہش مند لوگ 2026 کے انتخابات کے لیے آن لائن پہل میں شامل ہونے کے لیے اس پلیٹ فارم پر رجسٹر کر سکتے ہیں۔ اس کثیر سطحی حکمت عملی کے ساتھ بی جے پی کا مقصد مغربی بنگال میں ایک زوردار سیاسی مقابلے کے لیے جلد از جلد ماحول بنانا ہے ۔
