پاکستانی ٹیم کی شرکت‘ہندوستانی ویزوں کیلئے درخواست داخل
لاہور: پاکستان ویمن نیٹ بال ٹیم رواں سال ہندوستان میں ہونے والی ویمن ایشین نیٹ بال چیمپئن شپ میں شرکت کرے گی۔ویمن ایشین نیٹ بال چیمپئن شپ 18 سے 27 اکتوبر تک بنگلورو میں منعقد ہوگی اور پاکستان اسپورٹس بورڈ نے قومی نیٹ بال ٹیم کو اس اہم ایونٹ میں شرکت کیلئے این او سی جاری کردیا ہے۔ذرائع کے مطابق پاکستان نیٹ بال فیڈریشن نے ہندوستانی ویزوں کیلئے درخواست جمع کرادی ہے تاکہ ٹیم اور آفیشلز کی روانگی کو یقینی بنایا جاسکے۔ ذرائع کا بتانا ہے کہ اس چیمپئن شپ میں پاکستان کے 5 آفیشلز اور 12 کھلاڑی حصہ لیں گے اور نیٹ بال فیڈریشن نے چیمپئن شپ میں شرکت کا بجٹ پاکستان اسپورٹس بورڈ کو بھجوا دیا ہے۔ذرائع کے مطابق چیمپئن شپ میں شرکت کرنے والے ممکنہ کھلاڑیوں میں برطانیہ میں مقیم پاکستانی نیٹ بالرز بھی شامل ہیں جو برطانیہ میں ٹریننگ حاصل کررہے ہیں۔بعد ازاں ان کا پاکستان میں کیمپ ہوگا۔