ڈھاکہ ۔20 جولائی (سیاست ڈاٹ کام) بنگلہ دیش کے کپتان مشرفی مرتضیٰ زخمی ہونے کے باعث سری لنکا کے خلاف سریز میں شرکت نہیں کر سکیں گے اور ان کی جگہ تمیم اقبال ٹیم کی قیادت کے فرائض انجام دیں گے۔کولمبو روانگی سے قبل ٹیم کے ٹریننگ کیمپ کے آخری دن مشرفی مرتضیٰ عضلات میں جکڑن کا شکار ہو گئے۔اس کے ساتھ آل راؤنڈر محمد سیف الدین بھی زخمی ہونے کے باعث دورہ سری لنکا میں شرکت نہیں کر سکیں گے۔بنگلہ دیشی ٹیم مینجمنٹ نے مشرفی کی جگہ تمیم اقبال کو قیادت کی ذمے داری سونپ کر تسکین احمد کو ٹیم میں شامل کر لیا ہے جبکہ سیف الدین کی جگہ فرہاد رضا لیں گے۔ ان دونوںکھلاڑیوں کی زخمی ہونے کے سبب اب بنگلہ دیشی ٹیم کو سیریز میں ورلڈ کپ اسکواڈ کے 4 کھلاڑیوں کی خدمات حاصل نہیں ہوں گی۔اس سے قبل شکیب الحسن اور لٹن داس بھی ذاتی وجوہات کے سبب دورے کے لیے عدم دستیابی ظاہر کر چکے ہیں۔ بنگلہ دیش اور سری لنکا کے درمیان تین ونڈے میچوں کی سیریز کا پہلا میچ 26 جولائی کو کھیلا جائے گا۔
