کراچی۔ 9 ڈسمبر (سیاست ڈاٹ کام ) پاکستان کرکٹ بورڈ (پی سی بی) نے آئندہ ماہ بنگلہ دیش کے ساتھ مقرر دو میچوں کی سیریز کا ایک ٹسٹ کراچی میں ڈے اینڈ نائٹ کھیلنے کی تجویز دے دی۔ کرکٹ ویب سائٹ کرک انفو کی رپورٹ کے مطابق چیئرمین پی سی بی احسان مانی نے کہا کہ اس کا مقصد ڈے اینڈ نائٹ کرکٹ کی حوصلہ افزائی کرنا اور بنگلہ دیش کو پیش کش کرنے کی وجہ کم ہوتے شائقین کے مسئلے کا توڑ کرنا ہے۔ چیئرمین پی سی بی نے کہا کہ ہمارا ارادہ ہے کہ ہوم سیریز میں کم از کم ایک ٹسٹ ڈے اینڈ نائٹ ہو، تماشائیوں کی خاصی تعداد کے علاوہ اس کا فائدہ یہ ہے کہ ہمیں اپنے کرکٹ سیزن کو طول دینے کا ایک موقع میسر ہوگا۔ پاکستان میں اگر سیزن اپریل کے وسط یا اوائل میں ختم ہوتا ہے تو ہم اس کو ڈے اینڈ نائٹ میچوں کے ذریعے توسیع دے سکتے ہیں۔ احسان مانی نے کہا کہ خالی میدانوں میں ٹسٹ کرکٹ کھیلنا مناسب نہیں ہے اور اس خیال کے ساتھ ہمیں امید ہے کہ تماشائی شام کو اپنے کام سے واپسی پر اس منفرد تجربے سے فائدہ اٹھائیں گے۔ اس وقت ہر ٹسٹ کھیلنے والا ملک ڈے اینڈ نائٹ کرکٹ شروع کرچکا ہے اور ہم سمجھتے ہیں کہ سیریز میں کم ازکم ایک ٹسٹ ڈے اینڈ نائٹ کھیلا جائے۔ ہندوستانی کپتان ویراٹ کوہلی جو ڈے اینڈ نائٹ ٹسٹ کے حوالے سے کسی حد تک متذبذب تھے، اب بنگلہ دیش کے خلاف ہوم سیریز میں حالیہ میچ کے بعد اس کے سفیر بن گئے ہیں اس لئے یہ مستقبل کے لیے اچھا ہے۔ خیال رہے کہ بنگلہ دیش اور ہندوستان ڈے اینڈ نائٹ ٹسٹ کھیلا گیا تھا جو ان کی تاریخ کا پہلا ٹسٹ تھا جبکہ پاکستان اب تک چار ٹسٹ میچز کھیل چکا ہے جو آسٹریلیا، ویسٹ انڈیز اور سری لنکا کے خلاف تھے۔ پاکستان کو آسٹریلیا اور سری لنکا سے شکست کا سامنا کرنا پڑا تھا تاہم ویسٹ انڈیزکو2017 میں دبئی ٹسٹ میں 56 رنز سے شکست دی تھی۔ پاکستان ڈومیسٹک کرکٹ میں ڈے اینڈ نائٹ ٹسٹ کا تجربہ کرچکا ہے ۔
