دبئی ۔ 15 جنوری (سیاست ڈاٹ کام)پاکستان اور بنگلہ دیش کے درمیان سیریز کے انعقاد پر معاہدہ طے پاگیا ہے جس کے بعد بنگلہ دیش کی ٹیم دو مرحلوں میں پاکستان کے دورے اور ٹسٹ میچ کھیلنے پر رضامند ہو گئی۔ پاکستان اور بنگلہ دیش کے درمیان سیریز کے انعقاد کے حوالے سے چھائے غیر یقینی کے بادل چھٹ گئے اور دونوں ممالک کے کرکٹ بورڈز سیریز کے انعقاد پر متفق ہو گئے۔ پاکستان اور بنگلہ دیش کے کرکٹ بورڈز کے درمیان معاہدہ طے پا گیا جہاں یہ سیریز فیوچر ٹور پروگرام کا حصہ ہو گی۔پاکستان کرکٹ بورڈ کے چیئرمین احسان مانی اور چیف ایگزیکٹو وسیم خان نے بنگلہ دیش کرکٹ بورڈ کے ساتھ بات چیت کر کے انہیں دورے کے لیے راضی کیا۔انٹرنیشنل کرکٹ کونسل کے چیئرمین ششانک منوہر نے دبئی میں دونوں بورڈز کے حکام کے درمیان ملاقات میں بنگلہ دیش کو دورہ پاکستان کے لیے راضی کرنے کے لیے اپنا اثرورسوخ استعمال کیا۔ بنگلہ دیش کے دورہ پاکستان کے لئے شیڈول ازسرنو مرتب کیا گیا ہے جس کے تحت بنگلہ دیش کی ٹیم دو مرحلوں میں پاکستان کا دورہ کرے گی۔ پہلے مرحلے میں بنگلہ دیش کی ٹیم رواں ماہ تین ٹی20 اور ایک ٹسٹ میچ کے لیے پاکستان آئے گی جس کے بعد اپریل میں دونوں ٹیموں کے درمیان مزید ایک ٹسٹ اور ایک ونڈے میچ کھیلا جائے گا۔پاکستان سوپر لیگ کے انعقاد اور بنگلہ دیش کرکٹ بورڈ کے تحفظات کو مدنظر رکھتے ہوئے دورے کو دو حصوں میں تقسیم کیا گیا ہے۔ بنگلہ دیش کی ٹیم پہلا ٹی20 میچ 24 جنوری کو لاہور میں کھیلے گی جس کے بعد قذافی اسٹیڈیم 25 اور 27 جنوری کو بھی ٹی 20 میچز کی میزبانی کرے گا۔اس کے بعد دونوں ٹیموں کے درمیان پہلا ٹسٹ میچ 7 سے 11 فروری تک راولپنڈی میں کھیلا جائے گا۔ پہلے ٹسٹ میچ کے بعد بنگلہ دیش کی ٹیم وطن واپس لوٹ جائے گی اور پاکستان میں 20 فروری سے پاکستان سوپر لیگ کا آغاز ہو جائے گا۔ پاکستان سوپر لیگ کے اختتام پر بنگلہ دیش کی ٹیم اپریل میں دوبارہ پاکستان کا دورہ کرے گی جہاں سیریز کا واحد ونڈے میچ 3 اپریل کو کراچی میں کھیلا جائے گا۔ اس کے بعد 5 سے 9 اپریل تک سیریز کے دوسرے ٹسٹ میچ کے لیے دونوں ٹیمیں کراچی کے نیشنل اسٹیڈیم میں نبرد آزما ہوں گی۔ بنگلہ دیش کا دورہ پاکستان غیر یقینی صورتحال سے دوچار تھا جہاں بنگلہ دیش کرکٹ بورڈ ٹی 20 کے لیے ٹیم پاکستان بھیجنے پر تو رضامند تھا لیکن وہ ٹسٹ میچز کے لیے ٹیم پاکستان بھیجنے کے لیے تیار تھا۔ دونوں ممالک کے کرکٹ بورڈز کے درمیان سیریز کے انعقاد کے سلسلے میں کئی مرتبہ رابطے ہوئے لیکن حتمی نتیجہ برآمد نہ ہواکیونکہ پاکستان کرکٹ بورڈ نے دوٹوک الفاظ میں کہہ دیا تھا کہ پاکستان اپنے ہوم گراؤنڈ پر ہی تمام میچز کا انعقاد کرے گا۔
