ڈھاکہ، 6 نومبر (یو این آئی) بنگلہ دیش کی عبوری حکومت نے اعلان کیا ہے کہ وہ گزشتہ سال کی بغاوت کے دوران لوٹی گئی مشین گنوں، رائفلوں اور پستولوں کی واپسی پر نقد انعامات دے گی، تاکہ اہم انتخابات سے قبل درجنوں نہیں بلکہ سیکڑوں ہتھیار واپس حاصل کیے جاسکیں۔ ڈان نیوزمیں شائع فرانسیسی خبر رساں ادارے ‘اے ایف پی’ کی رپورٹ کے مطابق تقریباً 6 ہزار آتشیں ہتھیار اگست 2024 میں ہونے والی خونریز شورش کے دوران پولیس کے اسلحہ خانوں سے لوٹ لیے گئے تھے ، اس بغاوت نے سخت گیر وزیراعظم شیخ حسینہ کی حکومت کا تختہ الٹ دیا تھا۔ پولیس کے ترجمان اے ایچ ایم شہادت حسین کے مطابق اب تک ایک ہزار 300 سے زائد ہتھیار تاحال لاپتہ ہیں، پولیس نے ان ہتھیاروں کی واپسی پر دیے جانے والے انعامات کی تفصیل جاری کی ہے ۔ شہادت حسین نے کہا کہ بنگلہ دیش پولیس مکمل رازداری کی ضمانت دیتی ہے ، اور عوام سے اپیل کی کہ وہ ہتھیار واپس جمع کرا دیں۔
