کراچی ۔ 28 جنوری (سیاست ڈاٹ کام) پاکستان کرکٹ بورڈ (پی سی بی) کے چیف ایگزیکٹو آفیسر وسیم خان نے بنگلہ دیش کے دورہ پاکستان کو کسی معاہدہ کا نتیجہ قرار دینے کی افواہوں کی سختی سے تردید کی ہے۔ یاد رہے کہ رواں سال ٹی20 ایشیا کپ کی میزبانی پاکستان کوکرنی ہے اور میڈیا میں یہ خبریں زیرگردش ہیں کہ پاکستان نے ایشیا کپ کی میزبانی بنگلہ دیش کو دے کر انہیں دورہ پاکستان کے لیے راضی کیا تاہم وسیم خان نے ان افواہوں کی تردید کی ہے۔ 2018 میں جس وقت پاکستان کو اس ایونٹ کی میزبانی سونپی گئی تھی تو اس وقت یہ طے نہیں ہوا تھا کہ پاکستان ایونٹ کی میزبانی اپنی سرزمین پرکرے گا یا متحدہ عرب امارات میں لیکن گزشتہ ایک سے ڈیڑھ سال کے دوران پاکستان سوپر لیگ سمیت کئی بین الاقوامی سیریز کی کامیابی سے میزبانی کرنے کے بعد پاکستان اب اپنی ہی سرزمین پر ایونٹ کے انعقاد کا خواہاں ہے۔ وسیم خان نے میڈیا سے گفتگو میں کہا کہ بنگلہ دیش کو ایشیا کپ کی میزبانی دینے کی خبریں بالکل بے بنیاد اورغلط ہیں، ہم نے بنگلہ دیش سے ایشیا کپ کے بارے میں کوئی بات نہیں کی۔ انہوں نے کہا کہ یہ ایشین کرکٹ کونسل کا ٹورنمنٹ ہے اور ہمیں میزبانی کے حقوق انہوں نے ہی دیے ہیں اور ہم انہیں تبدیل نہیں کر سکتے۔ پاکستان میں ایشیا کپ کے انعقاد کی صورت میں ہندوستانی ٹیم کے ایونٹ میں شرکت پر سوالیہ نشان لگ سکتا ہے کیونکہ دونوں ملکوں کے درمیان کشیدہ صورتحال کے سبب گزشتہ مرتبہ ہندوستان میں مقرر ایونٹ کو بھی بنگلہ دیش منتقل کردیا گیا تھا۔ ہندوستان کی ستمبر میں منعقدہ شدنی ایونٹ میں شرکت کے حوالے سے سوال پر وسیم خان نے کہا کہ اس بات کا فیصلہ ایشین کرکٹ کونسل کرے گی اور ہم ایونٹ کے انعقاد پر دو مقامات پر بھی اسے کھیلنے پر غور سکتے ہیں۔