نئی دہلی: بھارتی کرکٹر ہربھجن سنگھ نے بدھ کو پنجاب کانگریس صدر نوجوت سنگھ سدھو سے ملاقات کی۔ پنجاب الیکشن سے کچھ ماہ پہلے ہوئی اس ملاقات کے بعد ہربھجن سنگھ کے کانگریس میں شامل ہونے کی قیاس آرائیاں تیز ہوگئی ہیں۔ ہربھجن سنگھ کے ساتھ اپنی اس ملاقات کی تصویر نوجوت سنگھ سدھو نے ٹوئٹر پر بھی نشر کی ہے۔ نوجوت سنگھ سدھو نے یہ تصویر شیئر کرکے لکھا ہے، ’امکانات سے لبریز تصویر.. چمکتے ستارے باجی کے ساتھ‘۔ حالانکہ سیاست میں آنے سے متعلق ہربھجن سنگھ نے فی الحال کوئی ردعمل ظاہر نہیں کیا ہے۔واضح ہو کہ اس سے کچھ دن پہلے ہربھجن سنگھ کے بی جے پی میں شامل ہونے کی بھی قیاس آرائی کی لگائی جا رہی تھی، جنہیں ہربھجن سنگھ نے خود ٹویٹ کرکے مسترد کردیا تھا۔ ذرائع کے مطابق پنجاب کانگریس ہربھجن سنگھ کو کسی اہم نشست سے انتخابی میدان میں اتارنا چاہتی ہے۔ اس کے ساتھ ہی ہربھجن سنگھ پارٹی کے اسٹار پرچارکوں میں بھی شامل ہوسکتے ہیں۔ ایسا کہا جا رہا ہے کہ اسے لے کر ہربھجن سنگھ سے بات چیت چل رہی ہے۔ حالانکہ فی الحال اس پر آخری رضامندی نہیں ہوئی ہے۔کچھ وقت پہلے ہی ایک میڈیا ادارے نے ٹوئٹر پر ایک ٹوئٹ میں ہربھجن سنگھ کو ٹیگ کرتے ہوئے ذرائع کے حوالے سے لکھا تھا، ’پنجاب بی جے پی 2022 کے پنجاب انتخابات سے قبل ہربھجن سنگھ اور یوراج سنگھ پر نظر رکھے ہوئے ہیں۔ دونوں جلد ہی بی جے پی میں شامل ہوسکتے ہیں۔ ہربھجن سنگھ نے اس خبر کو ری ٹوئٹ کرتے ہوئے فرضی قرار دیا تھا‘۔
