ساٹا پور کے ہفتہ وار بازار کو بند رکھنے کی ہدایت: آر ڈی او
بودھن۔ بودھن میں قائم سرکاری ضلع ہاسپٹل میں مرض کوویڈ سے متاثرہ افراد کیلئے یہاں 50 بیڈس مختص کئے گئے جو گذشتہ روز مریضوں سے مکمل بھر گئے ۔ مزید چار مریضوں کو یہاں ضلع ہاسپٹل میں بیڈز دستیاب نہ ہونے کی وجہ سے مریضوں کو دوسرے دواخانوں کا رُخ کرنا پڑا۔ سوبستروں پر مشتمل بودھن گورنمنٹ ہاسپٹل میں پچاس بیڈز کوویڈ مرض سے متاثرہ مریضوں کیلئے مختص کئے گئے۔ ہاسپٹل سپرنٹنڈنٹ ڈاکٹر انا پورنا کے مطابق یہاں عام مریضوں اور زچگی کیلئے آنے والے خواتین کیلئے پہلے سے ہی بستروں کی کمی محسوس کی جارہی ہے ۔ دواخانہ میں موجود دیگر کمروں کو بھی اِن پیشنٹس کیلئے مختص کرنے کے بعد بودھن ڈسٹرکٹ ہاسپٹل میں بیڈز کی جملہ تعداد 143 ہوگی۔ ہاسپٹل سپرنٹنڈنٹ کے مطابق یہاں ماہانہ اوسط دو تا تین سو خواتین زچگی کیلئے آتی ہیں لیکن اس دواخانہ میں کورونا وائرس سے متاثرہ مریضوں کی موجودگی کے باعث زچگی کو آنے والے خواتین کی تعداد میں کمی واقع ہوئی ۔ انہوں نے بتایا کہ متعدی مرض کوویڈ سے متاثرہ افراد اور دیگر امراض کے علاج کیلئے سرکاری دواخانہ سے رجوع ہونے والوں کیلئے عارضی طور پر دو سیکشنس بنادئے گئے ہیں لیکن یہ دونوں کیلئے ناکافی ثابت ہورہے ہیں۔ آر ڈی او بودھن راجیشور نے بودھن ڈسٹرکٹ ہاسپٹل کا دورہ کیا۔ اس موقع پر دواخانہ انتظامیہ نے یہاں ڈسٹرکٹ ہاسپٹل میں موجود سیکشن کو ورنی منڈل کے سرکاری دواخانہ میں منتقل کرنے کی تجویز پیش کی۔ بودھن شہر کے ساتھ مواضعات میں بھی مریضوں کی تعداد میں مسلسل اضافہ کو دیکھتے ہوئے آر ڈی او بودھن نے اعلان کیا کہ کسی بھی موضع میں مریضوں کی تعداد 20 سے زائد پائی جانے پر اس موضع کو کنٹینمنٹ زون میں تبدیل کردیا جائے گا۔ پڑوسی ریاست مہاراشٹرا کے بارڈر سے متصل ساٹا پور کے ہفتہ واری بازار کو آئندہ اعلان تک بند رکھنے کی مقامی انتظامیہ کو ہدایتیں جاری کی۔ واضح رہے کہ ساٹا پور بازار ضلع نظام آباد کا سب سے بڑا ہفتہ واری بازار کہلایا جاتا ہے، اس بازار میں خریدوفروخت کرنے والے آدھے سے زیادہ افراد پڑوسی ریاست مہاراشٹرا سے یہاں پہنچتے ہیں۔