جے پور،27 فروری(سیاست ڈاٹ کام)راجستھان اسمبلی میں آج اپوزیشن بی جے پی کے ارکان اسمبلی نے ضلع بوندی میں بس کے ندی میں گرنے سے 24افراد کی موت کے معاملہ میں حکومت کے جواب سے غیر مطمئن ہو کرواک آؤٹ کیا۔وقفہ صفر میں اٹھے اس معاملہ پرپارلیمانی امور کے وزیرشانتی دھاریوال نے بیان دیا۔مسٹر دھاریوال نے رکن اسمبلی چندر کانت میکھوال کے ذریعہ اٹھائی گئی بات پر کہا کہ جہاں حادثہ ہوا وہ پل اتنا تنگ نہیں ہے کہ صرف ایک ہی گاڑی نکل سکے ،وہ بھی وہاں سے سیکڑوں بار نکلے ہیں۔انھوں نے کہا کہ وہ سڑک کس کی حکومت میں بنی تھی۔اتنا کہتے ہی اپوزیشن کے ممبر کھڑے ہو گئے اور اس پر احتجاج کرتے ہوئے زور زور سے بولنے لگے ،جس سے ایوان میں ہنگامہ ہونے لگا،اس کے بعد اپوزیشن ممبران ایوان سے واک آؤٹ کر گئے ۔اس سے قبل مسٹر دھاریوال نے بتایا کہ حادثہ میں 24 افراد کی جانیں گئیں اور پانچ زخمی ہو ئے ہیں۔انھوں نے بتایا کہ ہر ایک ہلاک شدگان کے اہل خانہ کو دو لاکھ روپے اور زخمیوں کو 40 ہزار روپئے دئے جا رہے ہیں۔
