راہول گاندھی نے ہاسپٹل پہنچ کرزخمیوں کی عیادت کی
بنگلورو: کرناٹک کے بیلاری میں کانگریس کی بھارت جوڑو یاترا کے دوران ایک حادثہ پیش آیا۔ پد یاترا میں شامل4 کارکن بجلی کے کرنٹ سے جھلس گئے۔ تمام کارکنوں کو ہاسپٹل میں داخل کرایا گیا ہے۔ پد یاترا اتوار کی صبح بیلاری سے شروع ہوئی تھی اور اس کے بعد پیدل یاترا موکہ نامی مقام تک پہنچی۔پد یاترا میں شامل کچھ کارکنان نے پارٹی کا جھنڈا اور لوہے کی سلاخیں اٹھا رکھی تھیں۔ جیسے ہی لوہے کی سلاخ بجلی کے تار سے ٹکرائی، انہیں کرنٹ کا جھٹکا لگ گیا۔کانگریس کے ترجمان رندیپ سرجے والا کے مطابق موقع پر موجود ایمبولینس کے ڈاکٹروں نے ابتدائی علاج کیا۔ اس کے بعد زخمیوں کو ہاسپٹل میں داخل کرایا گیا۔ پد یاترا کے درمیان راہول گاندھی زخمی کارکنوں سے ملنے ہاسپٹل پہنچے اور ان کی حالت دریافت کی اور ان کی جلد صحت یابی کے لئے دعا کی۔ کانگریس پارٹی کی بھارت جوڑو یاترا 7 ستمبر کو کنیا کماری سے شروع ہوئی جو 3750 کلومیٹر کا فاصلہ طے کرتی ہوئی سرینگر، جموں و کشمیر میں ختم ہوگی۔ اس دوران پد یاترا 12 ریاستوں اور مرکز کے زیر انتظام علاقوں سے گزرے گی جبکہ کانگریس صدر کے الیکشن کے باعث 16 اور 17 کو وقفہ ہے۔